भरतपुर ११, चितवनस्थित हिमाली ब्राह्मी बचत तथा ऋण सहकारी संस्था लि. को २९ औं वार्षिक साधारणसभा आज, भदौ २५ गते सम्पन्न भएको छ । पहिलो सत्रको अध्यक्षता संस्थाकी अध्यक्ष भवानी देवी अधिकारीले गर्नुभएको थियो भने प्रमुख अतिथि भरतपुर महानगरपालिका वडा नं. ११ का वडा अध्यक्ष कमल बहादुर मल्ल रहनुभएको थियो । विशिष्ट अतिथिहरुमा नेफ्स्कूनकी सञ्चालक सदस्य विद्या कोइराला, चितवन जिल्ला सहकारी संघका वरिष्ठ उपाध्यक्ष भक्तिराम अधिकारी, चितवन जिल्ला बचत संघका अध्यक्ष हरिश्चन्द्र सुवेदी लगायत अन्य अतिथिहरुमा स्थानीय सहकारीकर्मीहरुको उपस्थिति रहेको थियो । 

साधारणसभामा साकोसको विकासमा योगदान पुर्याउने अग्रज व्यक्ति कर्मचारी, विविध विधामा उत्कृष्ट सदस्य तथा बाल बचतकर्ताहरुलाई  सम्मान तथा पुरस्कार प्रदान गरिएको थियो । साकोसले संस्थापक अध्यक्ष पुरस्कार तेजमाया पौडेललाई र उत्कृष्ट कर्मचारीतर्फ कर्जा सहायक मञ्जु कार्कीलाई पुरस्कृत गरिएको थियो । 

सभामा साकोसको प्रगति विवरण, नीति तथा कार्यक्रम सचिव गिता के.सी.अधिकारीले पस्तुत गर्नुभएको थियो भने बजेट प्रतिवेदन कोषाध्यक्ष सरला घिमिरेले प्रस्तुत गर्नुभएको थियो । असार मसान्तसम्म साकोसको कुल सम्पत्ती २३ करोड ४२ लाख २९ हजार ८७५ र सदस्य संख्या १ हजार ९ सय ४७ रहेको जानकारी गराइएको थियो । 

संस्थाकी उपाध्यक्ष मिना कुमारी पाण्डेले स्वागत मन्तव्य राख्नुभएको कार्यक्रमको सञ्चालन सचिव गिता अधिकारीले गर्नुभएको थियो । साधारणसभामा ७५ प्रतिशत सदस्यहरुको उपस्थिति रहेको थियो ।