जनकपुरधाम । नेफ्स्कून फिल्ड कार्यालय जनकपुरको आयोजनामा जनकपुरधाममा सञ्चालित लेखा व्यवस्थापन तालिम भाद्र २४ गते शुक्रबार सम्पन्न भएको छ । भाद्र २२ गतेदेखि सञ्चालित तालिममा २५ बचत तथा ऋण सहकारी संस्थाबाट २७ जनाको सहभागिता रहेको थियो । 

तालिमको समापन फिल्ड व्यवस्थापन उप समिति सदस्य गंगा बलम्पाकीको अध्यक्षता र जनकपुरधाम उपमहानगरपालिकाका नगरप्रमुख मनोज कुमार साहको आतिथ्यतामा भएको थियो । 

प्रमुख अतिथि नगर प्रमुख साहले  जनकपुरधाममा खराब सहकारीले गर्दा राम्रो सहकारीलाई पनि असर गरेको हुनाले अब जनकपुरधामका सबै सहकारी सुशासनमा चल्नुपर्नेमा जोड दिनुभएको थियो । 

उहाँले सहकारी सञ्चालनका क्रममा नीति र विधिको पालनालाई विशेष ध्यानदिनुपर्ने भन्दै नगरपालिकाले दश दिनभित्र सहकारीको नीति नियम र सञ्चालन प्रक्रिया प्रमाणित गर्न र कानुनको कार्यान्वयमा तीब्र रुपले लाग्न मार्गनिर्देशन गर्नुभएको थियो ।  

उहाँले नेफ्स्कूनले स्थानीय तहसँगको साझेदारीमा सञ्चालन गरेको आधारशिला कार्यक्रमको प्रशंसा गर्दै अब जनकपुरधाम उप महानगरपालिका पनि आधारशिला कार्यक्रममा सम्झौता गरेर अगाडि बढ्ने प्रतिबद्धता व्यक्त गर्नुभएको थियो । 
नगरप्रमुख साहले यही दशै अगाडि नै आधारशिला कार्यक्रम अभिमुखीकरणका लागि उपप्रमुख, वडा अध्यक्ष र प्रशासकीय अधिकृत सँग छलफल गरी अगाडि बढ्ने बचनबद्धता समेत व्यक्त गर्नुभएको थियो । 

समापनका अवसरमा जनकपुरधाम उपमहानगरपालिका १० नं. वडाका वडाअध्यक्ष, जनकपुर फिल्ड व्यवस्थापन उप समिति सदस्य सुधिर कुमार पाण्डे, नविन कुमार कर्ण, विजय कुमार साह र बैष्णवी साकोसका कार्यकारी प्रमुख जयनाथ मण्डलको पनि उपस्थिति रहेको थियो । 

कार्यक्रममा वडा नं. १० का वडा अध्यक्ष, फिल्ड व्यवस्थापन उपस समिति सदस्य सुधिर कुमार पाण्डे र गंगा  बलम्पाकीले पनि शुभकामना मन्तव्य राख्नु भएको थियो । 
तीन दिवसीय लेखा व्यवस्थापन तालिमको सहजिकरण नेफ्स्कूनका तालिम अधिकृत उमेश कोइरालाले गर्नु भएको थियो भने तालिमको व्यवस्थापन जनकपुरधाम फिल्ड कार्यालयले गरेको थियो ।