काठमाडौं । संविधान दिवसको अवसरमा आज राष्ट्रिय सहकारी महासंघका अध्यक्ष मिनराज कडेल सहित चार सहकारीकर्मी सुप्रबल जनसेवाश्री पदकबाट सम्मानित घोषित हुनुभएको छ । 

विभूषित घोषित हुने सहकारीकर्मीहरुमा महासंघका अध्यक्ष कडेल, राष्ट्रिय सहकारी बैंकका अध्यक्ष के.बी.उप्रेती, जनउत्थान बचत तथा ऋण सहकारी संस्था लि.,रुपन्देहीकी अध्यक्ष ज्ञानु पौड्याल र सन्तानेश्वर नौधारा बचत तथा ऋण सहकारी संस्था, ललितपुरकी अध्यक्ष शशी खड्का (गुरुङ) पर्नुभएको छ ।

त्यसैगरी बागमती प्रदेश सहकारी विभागका रजिष्ट्रार नारायणप्रसाद ज्ञवाली पनि सुप्रबल जनसेवाश्री पदकबाट विभूषित घोषित हुनुभएको छ । 

सरकारको सिफारीसमा राष्ट्रपति विद्यादेवी भण्डारीबाट विभिन्न क्षेत्रमा उल्लेखनिय कार्य गरी महत्वपूर्ण योगदान पुर्याएका व्यक्तिहरुलाई मानपदवी, अलङ्कार र पदकद्वारा विभूषित गर्ने घोषणा गरिएको थियो । विभूषित घोषित हुने करिब एक हजार जनामध्येमा सहकारी क्षेत्रबाट चार जना पर्नुभएको छ भने प्रदेश सहकारी रजिष्ट्रार ज्ञवाली पनि चयन हुनुभएको छ । संविधान दिवसको अवसर पारेर असोज ३ गते, सोमबार घोषणा गरिएको मानपदवी नयाँ वर्षको दिन बैशाख १ गते प्रदान गर्ने गरिएको छ ।  

सुप्रबल जनसेवाश्री पदकबाट विभूषित घोषित सहकारीकर्मीहरु र प्रदेश सहकारी रजिष्ट्रार ज्ञवालीलाई हार्दिक बधाई तथा शुभकामना ।