दोलखा । मैनापोखरीमा मुख्य कार्यालय रहेको जनमुखी बचत तथा ऋण सहकारी संस्था लि. को २५ औं वार्षिक साधारणसभा साथै रजत स्मारक उद्घाटन कार्यक्रम सम्पन्न भएको छ । साकोसले असोज १ देखि ५ गतेसम्म एकाइगत साधारणसभा गर्दै सभाको समापन साथै साकोसको रजत बर्ष शुभारम्भसहित रजत स्मारकको उद्घाटन गरेको हो । साकोसका अध्यक्ष माधव प्रसाद दहालको अध्यक्षता र नेफ्स्कूनका सञ्चालक एवम् बागमती प्रदेश बचत संघ प्रोस्कूनका महासचिव जिवसराज खड्काको प्रमुख आतिथ्यतामा स्मारक उद्घाटन गरिएको थियो । 

सभामा संस्थाका सचिव लक्ष्मण चौलागाइले वार्षिक प्रतिवेदन प्रस्तुत गर्नुभएको थियो भने कोषाध्यक्ष राजन केसीले आर्थिक वर्ष २०७८/०७९ को वित्तीय विवरण प्रस्तुत गर्दै २० हजार ३ सय ९१ शेयर सदस्य, १० करोड ९१ लाख ६७ हजार शेयरपुँजी, ७ करोड ६६ लाख जगेडा कोष, ८६ करोड ५ लाख बचत संकलन र १ अर्ब ४ करोड ५० लाख ऋण लगानी गरी २ करोड १५ लाख २१ हजार खुद बचत गरेको जानकारी गराउनुभयो । 

३ सय ६५ दिन नै सदस्यहरुलाई वित्तीय सेवा प्रदान गर्दै आइरहेको साकोसले सहुलियत कृषि ऋण तथा कृषकहरुलाई कृषि औजार वितरण गर्दै आइरहेको जनाएको छ । साकोसले जटिल रोग लागेका सदस्यहरुलाई आर्थिक सहायता, बृद्ध सदस्यहरुलाई मासिक भत्ता, अपांगता भएका सदस्य र सुत्केरी सदस्यलाई सुत्केरी भत्ताको व्यवस्थालाई निरन्तरता गरेको जनाएको छ । 

साकोसले मुख्य कार्यालय सहित ६ वटा सेवा केन्द्रमार्फत सदस्यहरुलाई वित्तीय सेवा उपलब्ध गराउँदै आएको साकोसका प्रमुख व्यवस्थापक भेष बहादुर मिजारले जानकारी गराउनुभयो । 

साकोसले डिजिटल प्रविधि प्रयोगलाई बढावा दिँदै मोबाइल बैंकिङ, मिस्ड कल, एसएमएस सेवा साथै कनेक्ट आइपीएस र क्यु आर पेमेन्ट जस्ता प्रविधिमैत्री सेवा दिँदै आएको जनाएको छ ।