लमजुङ  । तनहुँ र लमजुङमा सञ्चालित बचत तथा ऋण सहकारी संस्थाहरुका लागि ऋण असुली तथा धितो लिलामको कानुनी प्रक्रिया सम्बन्धी तालिम सञ्चालन गरिएको छ । उक्त तालिमसँगै सहभागी साकोस प्रतिनिधिहरुसँग सहकारीका समयसामयिक विषयहरुमा समेत शनिबार वृहत अन्तरक्रिया गरिएको थियो । कार्यक्रममा गोरखाबाट १४ जना, तनहुँबाट २ जना र लमजुङबाट ५१ जना गरी विभिन्न बचत तथा ऋण सहकारी संस्थाका कुल ६७ जना साकोस प्रतिनिधिहरुको तालिममा सहभागिता रहेको थियो । 

नेफ्स्कून लमजुङ फिल्ड कार्यालयको आयोजनामा सञ्चालित एक दिवसीय तालिम साथै अन्तरक्रिया कार्यक्रमको अध्यक्षतामा फिल्ड कार्यालय व्यवस्थापन उपसमिति सदस्य महेन्द्रलाल श्रेष्ठ र प्रमुख आतिथ्यतामा नेफ्स्कूनका अध्यक्ष परितोष पौड्याल रहनुभएको थियो । 

कार्यक्रममा जिल्ला बचत संघ लमजुङका अध्यक्ष दुर्गा भक्त धमला,  फिल्ड व्यवस्थापन उपसमिति सदस्य ताराराज घले, रामजी कडेल लगायत सहभागी हुनुहुन्थ्यो । 

प्रमुख अतिथि अध्यक्ष पौड्यालले साकोसको बर्तमान अबस्था, संघले अभियानमा खेलेको भूमिका तथा साकोसले गर्नुपर्ने कामहरु तथा अभियानको  नेतृत्ब सम्बन्धी बिषयमा आफ्नो प्रस्तुतीकरण गर्नुभएको थियो ।

फिल्ड व्यवस्थापन उपसमितिका सदस्य ताराराज घले तथा दुर्गा भत्त धमलाले नेफ्स्कूनले गर्ने तालिम गुणस्तर, समयसान्दर्भिक र महत्वपूर्ण भएकोले आजको तालिमले सहकारी अभियानमा साकोसहरुलाई अगाडि बढ्न टेवा पुग्ने बताउनुभयो । साकोसका लागि तालिम अत्यन्त महत्वपूर्ण रहेकोले तालिमबाट  प्राप्त ज्ञान व्यवहारमा प्रयोगमा ल्याउन अनुरोध गर्नुभयो ।

तालिमको सहजीकरण नेफ्स्कूनका कानुनी सल्लाहकार अधिवक्ता शिव कुमार अधिकारीले गर्नुभएको थियो । कार्यक्रम सञ्चालन नेफस्कून लमजुङ फिल्ड कार्यालयका इन्चार्ज बिनोद ढकालले गर्नुभएको थियो ।