काठमाडौं । कालिमाटीमा रहेको अ‍ैंचो पैंचो बचत तथा ऋण सहकारी संस्था लि. को ३४ बार्षिक उत्सव तथा २९औं बार्षिक साधारणसभा शनिबार सम्पन्न भएको छ । साकोसका अध्यक्ष दयाराम प्रजापतीको अध्यक्षता र नेफ्स्कूनका अध्यक्ष परितोष पौड्यालको प्रमुख आतिथ्यतामा साधारणसभाको समुद्घाटन भएको थियो । 

प्रमुख अतिथि अध्यक्ष पौड्यालले वर्तमान अवस्थामा डिजिटल प्रविधिको प्रयोग र वित्तीय साक्षरता तथा वित्तीय हितको क्षेत्रमा संस्थाले कार्य गर्नुपर्नेमा जोड दिनुभएको थियो । उहाँले सहकारी क्षेत्रको दिगो विकास र सुदृढीकरणका लागि प्रविधि प्रयोग औतित्यतामाथि प्रकाश पार्दै नेफ्स्कूनद्वारा प्रवद्र्धित एकीकृत प्रविधि विकासमा जोडिन अनुरोध गर्नुभएको थियो । 

अध्यक्ष दयाराम प्रजापतिले वर्तमान आर्थिक संकटको समयमा सहकारीहरुले सिस्टम र सदस्य हितको क्षेत्रमा काम गरेमात्र दिगो रुपमा सञ्चालन हुनसक्ने कुरालाई मनन गर्दै संस्थालाई अगाडि बढाएको बताउनुभयो । उहाँले प्रविधि प्रयोग अव अपरिहार्य रहेको भन्दै छिट्टै साकोसले सदस्यहरुमाझ एटिएम सेवा सञ्चालनमा ल्याउन लागेको समेत जानकारी गराउनुभयो । 

सभामा साकोसका अध्यक्ष प्रजापति, सचिव इन्दिरा कुमारी पोखरेल, कोषाध्यक्ष युवलाल प्रसाद पौडेल र लेखा सुपरिवेक्षण समितिका संयोजक राजेन्द्र देवकोटाले क्रमशः बार्षिक प्रतिवेदन, आर्थिक प्रतिवेदन, कोषाध्यक्षको प्रतिवेदन र लेखा सुपरिवेक्षण समितिको प्रतिवेदन प्रस्तुत गर्नुभएको थियो । 

कूल २ हजार ७ सय शेयर सदस्य र ५ सय बालबचत कर्ता आबद्ध साकोसको कुल वासलात ५५ करोड रुपैंयाको रहेको जनाएको छ । रु. ३७ करोड बचत, रु. ३२ करोड ऋण लगानी रहेको साकोको ९ प्रतिशत जगेडा कोष रहेको छ । शेयर सदस्यहरुलाई १४ प्रतिशत लाभांश प्रस्ताव पारित गरेको साकोसले गत बर्षको कुल नाफा करिब २ करोड रहेको जनाएको छ । 
कार्यक्रमको सहजीकरण संस्थाका शिक्षा उपसमितिका सदस्य शालिकराम कालाथोकीले गर्नुभएको थियो । 

कार्यक्रममा उत्कृष्ठ नियमित बचतकर्ता सदस्य, उत्कृष्ठ ऋणी सदस्य, जेष्ठ नागरिक सदस्य, सबै भन्दा धेरै सदस्य बनाउने सदस्य, एस. ई.ई. उतिर्ण बालबचतकर्ता र उत्कृष्ठ कर्मचारीलाई सम्मान गरिएको थियो । 

सञ्चालक समिति निर्वाचन

अ‍ैंचो पैंचो साकोसको २९औं बार्षिक साधारणसभाले पुनः दयाराम प्रजापतिको अध्यक्षतामा नयाँ सञ्चालक समिति सर्वसम्मत निर्वाचित गरेको छ । सञ्चालक समितिका पदाधिकारीहरु, सञ्चालकहरु र लेखा सुवपरिवेक्षण समितिका सदस्यहरु पनि पुनः सर्वसम्मत निर्वाचित हुनुभएको छ । लेखा सुपरिवेक्षण समितिको एक सदस्य भने नवनियुक्त हुनुहुन्छ ।