काठमाडौं । सुदूरपश्चिम प्रदेशका सहकारीहरुलाई लक्षित गरि ऋणको कानुनी प्रक्रिया तथा धितो मुल्याङ्न तालिम सम्पन्न भएको छ । नेफ्स्कूनको आयोजनामा मंसिर १७ गते सञ्चालित तालिम नेफ्स्कूनका सञ्चालक सदस्य माधव प्रसाद जोशीको अध्यक्षता, नवनिर्वाचित प्रतिनिधिसभा सांसद तारालामा तामाङको प्रमुख आतिथ्यता र नेफ्स्कूनका लेखा सुपरिवेक्षण समितिका संयोजक नवराज सापकोटाको विशेष आतिथ्यतामा सम्पन्न भएको थियो । 

तालिममा कञ्चनपुर, डडेलधुरा, कैलाली, डोटी र दार्चुला जिल्लामा सञ्चालित बचत तथा ऋण सहकारी संस्थाका व्यवस्थापक र ऋण शाखामा कार्यरत कर्मचारीहरु गरि ५७ जनाको सहभागिता रहेको थियो । 

प्रमुख अतिथि सांसद लामाले सहकारीले जुनसुकै काम गर्दापनि सदस्यलाई केन्द्रमा राखेर गर्नुपर्ने बताउनुभएको थियो । उहाँले स्थानीय तहले पालिका स्तरमा भएका संस्थाको विकास र प्रवर्धनका काममा जोड दिनुपर्ने साथै सहकारीले सदस्यहरुलाई ऋण लगानी गर्दा उत्पादनमुलक क्षेत्र र सदस्यको आयआर्जनको क्षेत्रलाई ध्यान दिएर ऋण लगानी गर्नुपर्ने बताउनुभयो । 

नेफ्स्कूनका लेखा सुपरिवेक्षण समितिका संयोजक सापकोटाले सदस्यहरुको बचत नै सहकारीको लगानी योग्य ऋण भएकोले बचतको सुरक्षा सँगै सम्पत्ति तथा दायित्वको जिम्मेवारी पनि साकोसको हुने र सदस्यहरुलाई आर्यआजनका क्षेत्रमा ऋण लगानी गर्ने पहिलो प्राथमिकता हुनुपर्ने बताउनुभयो । साकोसले आफ्ना नीति नियमहरुको पालना गरी उत्पादनशिल क्षेत्रमा नियमसंगत ऋण लगानी गर्न सकेमात्रै ऋण को जोखिम कम हुने उहाँले स्पष्ट पार्नुभयो ।  

कार्यक्रममा कञ्चनपुर जिल्ला बचत संघका सचिव बसन्त भट्ट, कञ्चनपुर साकोस म्यानेजर्स क्लबका अध्यक्ष गणेश भट्ट उपस्थित हुनुहुन्थ्यो ।