काठमाडौं । नेफ्स्कून सेवा केन्द्र लाहानको आयोजनामा २ दिवसीय ऋणको कानुनी प्रक्रिया तथा धितो मुल्यांकन सम्बन्धी तालिम सिरहाको लाहानमा मंसिर १९ गते सम्पन्न भएको छ ।

तालिममा जिल्ला बचत संघ सिरहाका अध्यक्ष संजय कुमार महतोको अध्यक्षता र  जिल्ला बचत संघ सप्तरीका उपाध्यक्ष भवानी प्रसाद चौधरीको प्रमुख आतिथ्यता रहेको थियो । 

उपाध्यक्ष चौधरीले तालिमले साकोसको वित्तीय स्रोत परिचालनका लागि सदस्यको ऋण निवेदन परे पश्चात लगानी पूर्वको विश्लेषण, लगानीमा रहेको ऋणमा अनुगमन र कारणवश भाखा नाघेको अवस्थामा भाखा नाघेको ऋणको व्यवस्थापन सम्मका प्रक्रिया पुरा  गर्न सहयोग पुग्ने बताउनुभयो ।

तालिममा सिरहा र सप्तरी जिल्लामा सञ्चालित १५ बचत तथा ऋण सहकारी संस्थाका पदाधिकारी, सञ्चालक सदस्य, ब्यवस्थापक र कर्मचारी गरी १५ जनाको सहभागिता रहेको थियो । 

मार्ग १८ देखि १९ गतेसम्म सञ्चालित तालिमको सहजीकरण नेफ्स्कूनका तालिम अधिकृत सुमनराज घिमिरेले गर्नुभएको थियो भने आवश्यक समन्वय नेफ्स्कून सेवा केन्द्र लाहानका ईन्चाज संजय कुमार कर्ण र कर्मचारी गोविन्द प्रसाद प्रभाकरले गर्नु भएको थियो ।