काठमाडौं । बचत तथा ऋण सहकारी संस्था स्तरीकरण कार्यक्रम अन्तर्गत नेफ्स्कूनले आर्थिक बर्ष २०७८/०७९ को प्रोबेसन ब्राण्ड प्राप्त संस्था घोषणा गरेको छ । संघको पौष ७ गते बसेको ३१०औं सञ्चालक समितिको बैठकले अन्तिम परिक्षण गराइएका ८ साकोसका लागि प्रोबेसन ब्राण्ड घोषणा गरेको हो । 

एशियाली स्तरको स्तरीकरण कार्यक्रम अन्तर्गत काभ्रेपलाञ्चोकको चण्डेश्वरी बचत तथा ऋण सहकारी संस्था एक्सेस ब्रोञ्ज ब्राण्ड प्राप्त गर्न सफल भएको छ । एक्सेस ब्राण्डको घोषणा एशियाली ऋण महासंघको नोभेम्बर २०२२ मा प्रकाशित अक्कू न्यूज लेटर मार्फत गरिएको थियो ।

राष्ट्रिय स्तरको साकोस स्तरीकरण कार्यक्रम अन्तर्गत प्रोबेसन अन्तिम परिक्षण गराईएका ८ बचत तथा ऋण सहकारी संस्थाहरु क्रमशः ग्रामीण साकोस–सल्यान, जनसेवा साकोस –कास्की, जनउत्थान साकोस–रुपन्देही, लेटाङ साकोस –मोरङ, लेकाली स्वावलम्बन साकोस –गुल्मी, लोक कल्याणकारी साकोस –चितवन, नव विकास साकोस –रौतहट, र ठेचो महिला जागरण साकोस –ललितपुरले प्रोबेसन ‘सक्सिड’ ब्राण्ड प्राप्त गर्न सफल भएका छन् । ब्राण्डिङ घोषणा भएका साकोसहरुलाई संघको शुक्रबार हुने साधारणसभाका अवसरमा ब्राण्ड प्रदान गरिने कार्यक्रम रहेको छ । 

साकोस स्तरीकरण अन्तर्गत एक्सेस र प्रोबेसन ब्राण्ड प्राप्त गर्न सफल साकोसहरुलाई हार्दिक बधाई एवम् शुभकामना ।