दाङ । राप्ती विश्वासी बचत तथा ऋण सहकारी संस्था लि.(रफिकोल) तुलसीपुर, दाङको आयोजना तथा नेपाल बचत तथा ऋण केन्द्रीय सहकारी संघ लि. (नेफ्स्कून)को प्राविधिक सहयोगमा बैशाख १८ र १९ गते तालिम सञ्चालन गरिएको थियो । तालिममा संस्थाका अध्यक्ष ईन्द्रबहादुर बुढाथोकीको अध्यक्षता, संस्थाकै सल्लाहकार मानबहादुर डाँगीको प्रमुख आतिथ्यता एवम् प्रशिक्षक नेफ्स्कूनका तालिम अधिकृत कोमल राज अधिकारीको विशिष्ट आतिथ्यतामा संस्थाका सञ्चालक समिति, लेखा सुपरिवेक्षण समिति, उपसमिति र कर्मचारी गरी १८ जनाको सहभागिता रहेको थियो । 

प्रमुख अतिथि मानबहादुर डाँगीले सहकारीलाई कसले कसरी बुझेको छ ? सहकारी के हो ? सहकारीमा के गतिविधिहरू सञ्चालन हुन्छन् ? जस्ता कुराको व्याख्या विश्लेषण एवम् सहकारीमा व्यक्तिगत स्वार्थ र दुश्मनीको भावना नराखी निश्वार्थ रूपमा सदस्य एवम् संस्थाको हितमा निरन्तर लागि पर्नुपर्ने बताउनुभयो ।  कार्यक्रमको सहजीकरण संस्थाका सचिव हेमराज गौतमले गर्नु भएको थियो । दुई दिने तालिमको विषय बस्तुको सहजीकरण प्रशिक्षक कोमल राज अधिकारीले गर्नु भएको थियो । समापन कार्यक्रममा सहभागीको तर्फबाट बोल्दै देवा बस्नेत र धु्रव गौतमले तालिम अत्यन्त उपयोगी, व्यवहारीक भएको र यसबाट सहकारीमा धेरै सिकाई हासिल भएको बताउनुभयो । 

तालिमका अवसरमा बोल्दै  नेफ्स्कूनका कार्यक्रम अधिकृत अधिकारीले ज्ञान, सीप र धारणाको विकास गरी वास्तविक व्यवहारमा केही न केही परिवर्तन आएमा मात्र तालिमबाट सिकाई भएको मानिने बताउनुभएको थियो ।