तनहूँमा सञ्चालित सहकारीहरुका लागि सुरक्षित ऋण परिचालन तथा जोखिम व्यवस्थापन तालिम प्रदान गरिएको छ । विहिबार आयोजित तालिममा विभिन्न ५६ वटा बचत तथा ऋण सहकारी संस्थाबाट ८० जनाको सहभागिता रहेको थियो । 

नेपाल बचत तथा ऋण केन्द्रीय सहकारी संघ लि.–नेफ्स्कून सेवा केन्द्र तनहूँको आयोजनामा सञ्चालित तालिमको उद्घाटन नेफ्स्कूनका सञ्चालक एवम् सदस्य सेवा कार्यलय पोखराका संयोजक चण्डी प्रसाद शर्मा पौडेलले गर्नुभएको थियो । 

तालिम उद्घाटन सत्रमा जिल्ला सहकारी संघ लि. तनहुँका अध्यक्ष प्रदिप राज अधिकारी, म्यानेजर्स क्लब दमौलीका अध्यक्ष बाबुराम मिश्र, भानु नगरपालिकाका सहकारी शाखा प्रमुख भगवती शर्मा लगायतको उपस्थिति रहेको थियो ।  

जिल्ला सहकारी संघ तनहूँका अध्यक्ष प्रदिप राज अधिकारीले सहकारी संस्था नीति र सिद्धान्त अनुरुप चल्नुपर्ने बताउँदै सदस्यको बचत सुरक्षाका लागि सहकारीले सुरक्षित ऋण परिचालनमा ध्यान दिनुपर्नेमा जोड दिनुभयो । नेफ्स्कूनका सञ्चालक सदस्य चण्डी प्रसाद शर्मा पौडेलले नीति र सिद्धान्त पालना गरेका सहकारीमा समस्या नरहेको बताउनुभयो । नीतिगत निर्णय गरेर र प्रक्रिया पुर्याएर गरिएको ऋण लगानी सुरक्षित हुन्छ, जथाभावी ऋण लगानी गर्दा सदस्यको बचत जोखिममा पर्ने सम्भावना बढी हुने भएकोले सहकारीका अध्यक्ष र व्यवस्थापक त्यसतर्फ सचेत रहनुपर्नेमा उहाँले जोड दिनुभएको थियो । 

तालिमको सहजीकरण नेफ्स्कून सदस्य सेवा कार्यलय पोखराका प्रमुख सुर्य प्रसाद तिमल्सीनाले गर्नु भएको थियो भने तालिम कार्यक्रम सञ्चालन नेफ्स्कून सेवा केन्द्र खैरेनिटार तनहुँका कार्यलय प्रमुख दिपक आचार्यले गर्नुभएको थियो ।