चितवन । पुर्वी चितवनका सहकारीहरुका लागि सहकारीमा जोखिम व्यवस्थापनका उपायहरु विषयक कार्यक्रम सञ्चालन गरिएको छ । टाडी सदस्य सेवा केन्द्रको आयोजनामा जेष्ठ २२ गते सञ्चालित एक दिवसिय कार्यक्रममा २३  वटा बचत तथा ऋण सहकारी संस्थाका सञ्चालक समिति÷प्रतिनिधि र व्यवस्थापकहरु गरी ३६ जनाको उपस्थिति रहेको थियो ।

कार्यक्रम समापन गर्ने क्रममा नेफ्स्कून लेखा सुपरिवेक्षण समिति संयोजक नबराज सापकोटाले सहकारी संस्थाहरुमा आर्थिक तथा गैरआर्थिक पाटाहरुमा सुशासन र नीति नियम निर्माण र परिपालनाको कमी कमजोरीका कारण विद्यमान समस्या सिर्जित भएको बताउनुभयो । उहाँले जोखिम रहित सहकारी संस्था निर्माण गर्नको लागि नीति, नियम र सिद्धान्त परिपालनामा ध्यान दिनु अपरिहार्य रहेको बताउनुभयो । आर्थिक संकटको यस अवस्थामा सहकारीलाई जोगाउनको लागि स्तरिकरण कार्यक्रम तथा स्थिरीकरण कोषमा जोडिनका लागि  आग्रह गर्नु भयो । ऋण लगानीको भन्दा भाखा नाघेको ऋण असुली र तरलता व्यवस्थापनमा विषेश जोड दिन समेत आग्रह गर्नुभएको थियो । लगानी गर्दाको अवस्थामा विना धितोको ऋणमा भन्दा धितो सहितको ऋण लगानीमा जोड दिनको लागि समेत आग्रह गर्नुभयो । 

कार्यक्रम सहजीकरण संघका कार्यक्रम अधिकृत सुरज चालिसेले गर्नुभएको थियो । उहाँले संस्थामा हुनसक्ने जोखिम के हो ? न्यूनिकरण गर्न सकिने कार्यहरु र विभिन्न शिर्षकका जोखिमहरु जस्तै वित्तिय जोखिम, ऋण जोखिम, सञ्चालन जोखिम, आन्तरिक नियन्त्रण जोखिम र कानुनी जोखिमका बारेमा चर्चा गरी सोको समाधानका विषयहरुमा प्रष्ट पार्नुभएको थियो । कार्यक्रम सञ्चालन चितवन सदस्य सेवा कार्यालयका प्रमुख रिषभराज रेग्मीले गर्नुभएको थियोे । साथै कार्यक्रम व्यवस्थापन सहजीकरण टाडी सेवा केन्द्रका ईन्चार्ज केदार अधिकारीले गर्नुभएको थियोे ।