चितवन । भरतपुर –५, नारायणपुर स्थित नारायणी बचत तथा ऋण सहकारी संस्था लिमिटेडको आ.व २०८०/८१ को बार्षिक योजना (नीति तथा कार्यक्रम ) तर्जुमा गोष्ठी   सम्पन्न भएको छ । संस्थाका अध्यक्ष केशव वहादुर पौडेलको अध्यक्षता , भरतपुर–५ का वडा अध्यक्ष युद्धप्रसाद श्रेष्ठको प्रमुख आतिथ्यता र संस्थाका सह–सचिव तथा प्रोवेशन कार्यदल संयोजक हरिकृष्ण अधिकारीको सहजिकरणमा उक्त कार्यक्रम सञ्चालन भएको थियो । 

कार्यक्रमका सहजकर्ता हरिकृष्ण अधिकारीले प्रस्तावित नीति तथा कार्यक्रम  प्रस्तुत गर्नुभएको उक्त कार्यक्रममा नारायणी साकोसका सञ्चालक समिति, लेखा सुपरिवेक्षण समिति, उपसमिति, शेयर सदस्यहरु तथा कर्मचारीहरु गरी २०० जनाको सहभागिता रहेको थियो । सहजकर्ता अधिकारीले संस्थाको सबल, सक्षम पक्ष र संस्थागत लक्ष्य प्राप्ति प्रतिको प्रतिबद्धता प्रस्तुत गर्नुभएको थियो । 

सहभागी शेयर सदस्यहरुले राखेका जिज्ञासाहरु बारे सहजकर्ता अधिकारीले प्रस्ट पार्नुका साथै सल्लाह सुझावहरुलाई समेटेर नीति तथा कार्यक्रमलाई अन्तिम रुप दिने प्रतिबद्धता व्यक्त गर्नुभएको थियो । कार्यक्रममा उपाध्यक्ष पुष्पराज भट्टले स्वगत मन्तव्य राख्नुभएको थियोे ।

२०५४ सालमा स्थापना भएको नारायणी  साकोसमा हाल २ हजार सदस्य छन् भने साकोसको कुल सम्पत्ती १७ करोड ५ लाख  छ ।