भक्तपुर । नेफ्स्कूनको ऋण शाखामा कार्यरत कर्मचारीहरुको क्षमता विकास तालिम भक्तपुरको नगरकोटमा सञ्चालन भएको छ । भाद्र ६ देखि ९ गतेसम्म सञ्चालन हुने तालिममा संघको केन्द्रीय कार्यालय, विभिन्न सदस्य सेवा कार्यालय र सेवा केन्द्रमा कार्यरत सहायक स्तरका ऋण प्रशासकहरु गरी ४० जनाको सहभागिता रहेको छ । तालिमको उद्घाटन संघका कोषाध्यक्ष दिपक पनेरुले गर्नुभएको थियो । 

तालिम उद्घाटन सत्रलाई सम्बोधन गर्दै प्रमुख अतिथि कोषाध्यक्ष पनेरुले कर्मचारीहरुमा नयाँ ज्ञान, सीप र धारणाको विकास गरी व्यवस्थापकीय दक्षता अभिवृद्धि गर्न, सहकारीमा सुशासन कायम गर्नुका साथै कार्य क्षमतामा अभिवृद्धि ल्याउन तालिम उपलब्धिमूलक रहने विश्वास व्यक्त गर्नुभयो । उहाँले कार्यालयीय सफलता समूहकार्यमा निहित रहने हुँदा सामूहिक कार्यवातावरणको विकासमा जोड दिनुपर्ने बताउनभयो । 

तालिमको सहजीकरण संघका प्रमुख कार्यकारी अधिकृत शिवजी सापकोटा, सहकारी विभागका उपरजिष्ट्रार टोलराज उपाध्याय, संघका कानुनी परामर्शकर्ता अधिवक्ता शिव कुमार अधिकारी, धितो मूल्यांकनकर्ता इञ्जिनियर निराजन पुडासैनी  र संघका सहायक कार्यकारी अधिकृत एवं विभागीय प्रमुखहरुले गर्नुहुनेछ ।