काठमाडौं । नयाँ बानेश्वरमा रहेको इमानि बचत तथा ऋण सहकारी संस्था लि. को १३औं वार्षिक साधारणसभा विहीबार सम्पन्न भएको छ । साकोसका अध्यक्ष राजकुमार बुढाथोकीको अध्यक्षतामा आयोजित सभाको उद्घाटन नेफ्स्कूनका अध्यक्ष परितोष पौड्यालले गर्नुभएको थियो । साधारणसभामा बागमती प्रदेश बचत संघका सचिव गोविन्द काफ्ले, राष्ट्रिय सहकारी बैंकका बानेश्वर कार्यालय प्रमुख विनोद भट्टराई लगायत साकोसका सञ्चालक, स्थानीय सहकारीकर्मीहरु र शेयर सदस्यहरुको उपस्थिति रहेको थियो । 

साधारणसभालाई सम्बोधन गर्दै प्रमुख अतिथि नेफ्स्कूनका अध्यक्ष परितोष पौड्यालले बचत तथा ऋण सहकारी संस्थाले आफ्ना सदस्यका सम्पूर्ण वित्तीय आवश्यकता पुरा गर्न अहम भूमिका खेल्नुपर्ने बताउनुभयो । उहाँले साकोस सुदृढीकरणका लागि स्तरीकरण कार्यक्रममा सम्पूर्ण साकोसको पहुँच पुर्याउनुपर्ने आवश्यकता औल्याउनुभयो । अब हरेक साकोसले एउटा स्तरीकरण कार्यक्रम दृढताका साथ उभिएर एकसुत्रमा बाधिनुपर्छ, उहाँले भन्नुभयो, ‘सहकारीको विश्वव्यापी सिद्धान्त अवलम्बन गर्दै विश्व अभ्यासलाई आन्तरिकीकरण गर्नु जरुरी छ, त्यसका लागि राज्य र अभियान एकसाथ अगाडि बढ्नुको विकल्प छैन । नीति, विधि र एकीकृत प्रविधि विकासको माध्यमबाट अभियानको एकीकृत सञ्जालीकरण अवको आवश्यकता हो, उहाँले भन्नुभयो । 

साकोसको १३औं वार्षिक साधारणसभाले किशोर कुमार गौतमको अध्यक्षतामा सर्वसमम्मत नयाँ नेतृत्व समेत चयन गरेको छ । साधारणसभाले गौतमको अध्यक्षतामा सात सदस्यीय सञ्चालक समिति र दिपा खड्काको संयोजकत्वमा तीन सदस्यीय लेखा सुपरिवेक्षण समिति सर्वसम्मत चयन गरेको हो । नवनिर्वाचित समितिको उपाध्यक्षमा दिलिप गौतम, सचिव दिपक प्रसाद सापकोटा, कोषाध्यक्ष रुपक भण्डारी र सञ्चालकहरुमा मनोज बुढाथोकी, अन्जना अधिकारी र राम मणि नेपाल निर्वाचित हुनुभएको छ । त्यसैगरि लेखा सुपरिवेक्षण समितिको संयोजकमा दिपा खड्का र सदस्यहरुमा कृष्ण बहादुर बुढाथोकी र राम प्रसाद गौतम चयन हुनुभएको छ । 

२०७० फागुन ७ गतेदेखि अध्यक्ष राजकुमार बुढाथोकीको नेतृत्वमा सदस्यहरुबिच नियमित वित्तीय कारोबार शुभारम्भ गरेको साकोसको दर्ता आ.व. २०६७/०६८ मा भएको थियो । साकोसमा हाल ७ सय ५१ शेयर सदस्य छन् । साकोसको कुल शेयर पुँजी रु. २ करोड १७ लाख ८० हजार, बचत रकम रु. १३ करोड ५० लाख ८४ हजार ९ सय १५ , ऋण लगानी रु. ९ करोड ५६ लाख ७ हजार २४८ रहेको छ  भने साकोसको कुल सम्पत्ती तथा दायित्व १७ करोड ४५ लाख १६ हजार ७२१ रहेको छ । “सदस्यहरुको भरपर्दो सहयात्री, इमानी सहकारी” भन्ने मुल नाराका साथ सदस्यहरुमाझ वित्तीय तथा गैर वित्तीय सेवा प्रवाह गर्दै आएको साकोसको काठमाडौं महानगरपालिकाका वडा नं. ९, १०, ११, ३१ र ३२ कार्यक्षेत्र रहेको छ ।
    
साधारणसभाका अवसरमा साकोसले उत्कृष्ठ बचतकर्ता सदस्य १ जना, उत्कृष्ण ऋणी सदस्य १ जना र एसईई उत्तीर्ण ८ जना बालबचतकर्ता सदस्यहरुलाई सम्मान गरेको थियो ।