चितवन । हाम्रो चित्रवन बचत तथा ऋण सहकारी संस्था लि.भरतपुर–११, चितवनको २८औं वार्षिक साधारणसभा अन्तर्गत एकाइ प्रतिनिधिहरुको सभा आश्विन १२ गते शुक्रबार सम्पन्न भएको छ । 

साधारणसभामा साकोसका अध्यक्ष तेजेन्द्रबहादुर खड्काको अध्यक्षता, नेफ्स्कूनका अध्यक्ष  परितोष पौड्यालको प्रमुख आतिथ्यता र चितवन जिल्ला वचत तथा ऋण सहकारी संघकी अध्यक्ष एवम् नेफ्स्कूनकी सञ्चालक विद्या कोईरालाको बिशिष्ट अतिथ्यता रहेको थियो । 

साधारणसभालाई सम्बोधन गर्दै प्रमुख अतिथि नेफ्स्कूनका अध्यक्ष परितोष पौड्यालले बचत तथा ऋण सहकारी संस्थाले आफ्ना सदस्यका सम्पूर्ण वित्तीय आवश्यकता पुरा गर्न अहम भूमिका खेल्नुपर्ने बताउनुभयो । उहाँले साकोस सुदृढीकरणका लागि स्तरीकरण कार्यक्रममा सम्पूर्ण साकोसको पहुँच पुर्याउनुपर्ने आवश्यकता औल्याउनुभयो । अब हरेक साकोसले एउटा स्तरीकरण कार्यक्रम दृढताका साथ उभिएर एकसुत्रमा बाधिनुपर्छ, उहाँले भन्नुभयो, ‘सहकारीको विश्वव्यापी सिद्धान्त अवलम्बन गर्दै विश्व अभ्यासलाई आन्तरिकीकरण गर्नु जरुरी छ, त्यसका लागि राज्य र अभियान एकसाथ अगाडि बढ्नुको विकल्प छैन । नीति, विधि र एकीकृत प्रविधि विकासको माध्यमबाट अभियानको एकीकृत सञ्जालीकरण अवको आवश्यकता हो, उहाँले भन्नुभयो । 

सभामा भरतपुर महानगरपालिका वडा नं–०७ का वडा अध्यक्ष एंव संस्थाका पुर्व अध्यक्ष राजेन्द्रमणि काफ्ले, बिशिष्ट अतिथि विद्या कोईराला लगायतले शुभकामना मन्तव्य व्यक्त गर्नुभएको थियो । 

वन्दसत्रमा, संस्थाको आ.व.२०७९/८० को प्रगति र २०८०/८१ को प्रस्तवित नीति  तथा कार्यक्रम संस्थाका सचिव कृष्णप्रसाद पौडेलले प्रस्तुत गर्नु भएको थियो भने संस्थाको आ.व.२०७९/८० को आर्थिक प्रतिवेदन र आ.व  २०८०/८१ को अनुमानित आय ब्यय विवरण कोषाध्यक्ष नारायणप्रसाद उपाध्याय र लेखा सुपरिवेक्षण समितिको प्रतिवेदन समितिका संयोजक सुर्यवदना हमालले प्रस्तुत गर्नु भएको थियो । 

उक्त प्रतिवेदनहरु उपर सेयर सदस्यहरुले राख्नु भएको  जिज्ञासा र सुझावहरुका सम्वन्धमा संस्थाका उपाध्यक्ष, सचिव, कोषाध्यक्ष एवं प्रमुख कार्यकारी अधिकृत उमाकान्त पौडेलले सम्वोधन गर्नु भएको थियो । 

सो साधारण सभाको कार्यक्रम सञ्चालन सचिव कृष्णप्रसाद पौडेलले गर्नु भएको थियो भने धन्यवाद ज्ञापन सहित वन्दसत्रको समापन उपाध्यक्ष अनिलराज पौडेलले गर्नु भएको थियो ।