नेपाल बचत तथा ऋण केन्द्रीय सहकारी संघ (नेफ्स्कून) का अध्यक्ष परितोष पौड्यालले समुदाय र सदस्य केन्द्रीत  वित्तीय कारोबार गर्ने संस्थाहरु सुरक्षित रहेको बताउनुभएको छ । भक्तपुरस्थित बंगलामुखी बचत तथा ऋण सहकारी संस्थाको असोज २८ गते सम्पन्न १६औं बार्षिक साधारण सभाका प्रमुख अतिथि उहाँले  समुदायमा आधारित सहकारी संस्थाले सदस्यको बचतको सुरक्षा गर्ने विश्वास दिलाउनुभयो ।

अँध्यारोमा हिडेका संस्थाहरु जुन सुकै बेलामा पनि खाल्डोमा पर्न सक्ने भन्दै अध्यक्ष पौड्यालले नेफ्स्कूनको नीति, विधि र प्रविधिलाई आत्मसात गरेका  संस्थाहरु गन्तव्यमा पुग्ने निश्चित भएको दाबी गर्नुभयो ।  बंगलामुखी साकोस नेफ्स्कूनले सञ्चालन गरेको प्रोबेसन कार्यक्रममा आवद्ध रहेकाले हरेक कुराको रणनीति बनाएर  अघि बढेका कारण सुरक्षित रहेको बताउनुभयो । आधुनिकतासँगै विश्वमा प्रविधिको प्रयोग बढेकोले सहकारीहरुले अब सदस्यहरुलाई प्रविधिमैत्री बनाउँदै लैजानु पर्नेमा उहााँको जोड थियो । हरेक सदस्यलाई व्यावसायिक बनाउनु पर्ने भन्दै उहाँले त्यसका लागि सदस्यहरुलाई व्यावसायिक प्रवद्र्धन केन्द्रसँग जोड्न सुझाव दिनुभयो । सहकारीले सदस्यलाई धन आर्जनमा सहयोग गर्नु पर्ने र त्यसका लागि आवश्यक सीप, पुँजी र बजारीकरणको व्यवस्था संस्थाहरुले मिलाउनु पर्ने उहाँले बताउनुभयो । संस्था सुशासनमा मात्र बसरे नपुग्ने भन्दै अध्यक्ष पौडयालले सदस्यको बचतको सुरक्षा महत्वपूर्ण रहेको धारणा राख्नुभयो ।  

स्थिरीकरण कोषमा योगदान गर्ने संस्थाहरुमा वित्तीय संकट आउँदा उक्त कोषले सघाउने अध्यक्ष पौड्याले स्पष्ट पार्नुभयो । स्थिरिकरण कोषले संस्थाको सुरक्षा र स्तरिकरण कार्यक्रमले संस्थाको गुणस्तर वृद्धि गर्ने भन्दै यी कार्यक्रममा सहभागी संस्थाहरु सुरक्षित हुने उहाँको भनाइ छ । सहकारीका सदस्य मालिक, नियन्त्रक र संस्थाका क्रियाकलापबाट लाभ लिने व्यक्ति बन्नुपर्ने भन्दै उहाँले यसका लागि संस्थाको हरेक निर्णयमा सक्रिय सहभागिता जनाउन आग्रह गर्नुभयो । सहकारीलाई दैनिक जीवनसँग जोड्नु पर्ने र त्यसका लागि ‘साकोस संस्कृति’को विकास गर्नुपर्नेमा उहाँले जोड दिनुभयो । 

सहकारी क्षेत्र सुधार सुझाव कार्यदलले दिएको सुझावमा प्रारम्भिक सहकारी संस्था केन्द्रीय संघमा आवद्ध हुनुपर्ने व्यवस्था रहेको भन्दै उहाँले संघमा आवद्ध नहुने संस्थाहरु खारेजीमा समेत जाने बताउनुभयो । नीति र विधिलाई पालना गर्ने संस्था मात्र संघका सदस्य बन्न आउने भन्दै गलत मनासयले खोलेका संस्था अब नटिक्ने समेत उहाँको स्पष्टोक्ति थियो । 
साकोसका अध्यक्ष विवेक श्रेष्ठको अध्यक्षतामा आयोजित सभाले विभिन्न प्रतिवेदनहरु समेत पारित गरेको छ ।