दोलखा । बैतेश्वर गाउँपालिका-५ मैनापोखरीस्थित जनसचेतन बचत तथा ऋण सहकारी संस्थाको ३०औं वार्षिक साधारणसभा सम्पन्न भएको छ । संस्थाले कार्तिक १७, १८ र २०  गते सदस्य सहजताका लागि विभिन्न सेवा केन्द्रमा क्षेत्रगत साधारण सभा आयोजना गरी २२ गते समापन गरेको हो । साधारणसभामा बिभिन्न बिधामा सदस्यहरुलाई सम्मान समेत गरिएको छ । सभामा जेष्ठ सदस्यहरलाई स्टिलको लौरो बितरण गरिएको थियो ।  

संस्थाका अध्यक्ष हेमन्त चौलागाईंको अध्यक्षता तथा बागमती प्रदेशका श्रम रोजगार तथा यातायात मन्त्री लक्ष्मण लम्सालको प्रमुख आतिथ्ययतामा सभा सम्पन्न भएको हो । सभामा मन्त्री लम्सालले सहकारी संस्थाले ऋण लगानी गर्दा उत्पादनमा जोड दिनुपर्ने बताउनुभयो । सहकारीका लागि मुलुककै नमुना जिल्ला दोलखा भएकाले यहाँका सहकारीले एकीकृत पुँजी निर्माणमार्फत लगानी र रोजगारी वृद्धि गर्नुपर्ने उहाँको भनाइ थियो । सभामा संस्थाका अध्यक्ष चौलागाइले संस्थाको गत आर्थिक वर्ष २०७९/ ८० को असार मसान्तसम्म कुल सम्पत्ति तथा दायित्व २ अर्ब २५ करोड ६० लाख ८७ हजार ३ सय ९३ रुपैँया पुगेको जानकारी गराउनुभएको थियो । त्यसैगरी संस्थाको शेयर पुँजी १६ करोड ६७ लाख २४ हजार ९ सय रुपैयाँ र कुल बचत निक्षेप १ अर्ब ६३ करोड ९ लाख ५३ हजार ५ सय ४१ रुपैयाँ रहेको बताउनुभयो । संस्थाको जगेडा तथा अन्य कोषमा २१ करोड ९३ लाख ८५ हजार ९ सय १४ रुपैयाँ रहेको सभामा जानकारी गराइएको थियो । संस्थाले कुल १ अर्ब ८२ करोड २७ लाख ९८ हजार ७ सय ९३ रुपैँया ऋण लगानी गरेको छ ।

संस्थामा २७ हजार ६ सय ८ जना शेयर सदस्य र १० हजार ३ सय ३५ जना बाल सदस्य छन । त्यस्तै संस्थाको कुल आम्दानी २६ करोड ७१ लाख ६१ हजार ८ सय १० रुपैँया पुगेको छ । संंस्थाले सदस्य सुरक्षा कोष कार्यक्रम मार्फत सदस्यको मृत्यु पश्चात् आश्रित परिवारलाई ५ हजारदेखि ४० हजार रुपैयाँसम्म राहत प्रदान गर्दै आइरहेको जनाएको छ । सभामा संस्थाका पूर्व अध्यक्ष एवं बागमती प्रदेश सहकारी संघका महासचिव भिमप्रसाद दहाल, जनमुखी साकोसका उपाध्यक्ष गिताकृष्ण शर्मालगायतले शुभकामना मन्तव्य राख्नुभएको थियो । संस्थाले मुख्य कार्यालयसहित १६ वटा सेवा केन्द्रबाट सदस्यलाई वित्तीय सेवा प्रदान गर्दै आएको छ ।