काठमाडौं ।  सरकारले छुट्टै बिशिष्टीकृत संस्थामार्फत सहकारी नियमन गर्ने भएको छ । त्यसका लागि प्रक्रिया अघि बढाइने भएको छ । यसैगरी, सरकारले सहकारी क्षेत्रको बचत तथा ऋणको सुरक्षणका लागि सहकारी कोष पनि स्थापना गर्ने भएको छ । मुलुकको अर्थतन्त्रको विद्यमान अवस्था र सुधारका लागि तत्काल गर्नुपर्ने कामबारे सरोकारवालासँग हिजो भएको छलफल पछि प्रधानमन्त्री पुष्पकमल दाहालले उक्त जानकारी गराउनुभएको प्रधानमन्त्री तथा मन्त्रिपरिषद्को कार्यालयले विज्ञप्तिमार्फत जनाएको छ । निजी क्षेत्रसँग हिजो भएको छलफलपछि सहकारीको नियमन गर्न छुट्टै विशिष्टीकृत संस्थाको स्थापना गर्न आवश्यक प्रक्रिया अघि बढाइने जानकारी प्रधानमन्त्रीले गराउनुभएको थियो । त्यस्तै, सहकारी क्षेत्रको बचत तथा ऋणको सुरक्षणका लागि सहकारी कोष स्थापना गरिने समेत उहाँले जानकारी गराउनुभयो । सहकारीलाई आगामी छ महिनाभित्र नियमनको दायरामा ल्याउन एक विशिष्टीकृत संस्था स्थापना गरिने विज्ञप्तिमा उल्लेख छ ।