धनगढी । संगम बचत तथा ऋण सहकारी संस्था लिमिटेड धनगढीको ११औँ वार्षिक साधारण सभा सम्पन्न भएको छ । हिजो आयोजित साधारण सभालाई नयाँ अभ्यासको रुपमा अतिथिरहित बनाइएको थियो । सभामा उपस्थित ज्येष्ठ सदस्य कमलसिंह साहुलाई प्रमुख अतिथि बनाइएको थियो । साधारण सभामा शेयर सदस्य बाहेक अतिथि आमन्त्रण नगरिएका कारण भाषण भन्दा छलफल बढी भएको सहभागीहरूको प्रतिक्रिया थियो । सहकारी अभियानमा फरक सन्देश दिन नयाँ शैलीमा साधारण सभा गरिएको साकोसका अध्यक्ष मनमोहन विष्टले बताउनुभयो । बचतसँगै सहकारीका सवालबारे सेयर सदस्यहरूसँग बृहत् छलफलका लागि नयाँ शैलीमा अतिथिरहित साधारण सभा सञ्चालन गरिएको उहाँको भनाइ थियो । 

संगम सहकारीले प्रत्येक वर्ष सदस्य सङ्ख्या वृद्धि गर्दै लगेका छ । साकोसका अध्यक्ष मनमोहन विष्टले संस्थाले सदस्यको सङ्ख्या वृद्धि सँगै वित्तीय स्रोतमा पनि सकारात्मक परिवर्तन गरेको जानकारी दिनुभयो । उहाँका अनुसार आर्थिक वर्ष २०७९र८० मा मात्रै ४ सय ५३ जना नयाँ सदस्य थप भई कूल सदस्य सङ्ख्या २ हजार १ सय ६८ पुगेको छ ।

कार्यक्रममा प्रतिवेदन प्रस्तुत गर्दै अध्यक्ष विष्टले आर्थिक वर्ष २०७८र७९ सम्म शेयर पुँजी २ करोड ६९ लाख ८२ हजार रहेकामा आर्थिक वर्ष २०७९/८० मा ३ करोड ११ लाख २५ हजार पुगेको जानकारी गराउनुभयो । बचत बर्फ पनि आर्थिक वर्ष २०७८/७९मा २७ करोड ६ लाख ६१ हजार ३ सय ४८ रुपैयाँ ७३ पैसा रहेकोमा आर्थिक वर्ष २०७९/८० मा २९ करोड ४० लाख ५६ हजार ४ सय ९ रुपैयाँ ३५ पैसा पुगेको छ । सदस्यहरूको सुविधाका लागी सेवा केन्द्रहरूलाई थप व्यवस्थित गरिने, बचत नीतिलाई थप प्रभावकारी बनाइ नयाँ बचत योजनाहरू कार्यान्वयनमा ल्याइने लगायतका योजना अघि सारेको अध्यक्ष विष्टले बताउनुभयो । 

सहकारीको साधारण जगेडा कोषमा १ करोड ९२ लाख ६७ हजार ५ सय ७० रुपैयाँ जम्मा भएको छ । यस्तै अन्य कोषमा १ करोड २६ लाख २९ रुपैयाँ,कर्जा जोखिम व्यवस्था १ करोड २५ लाख ८५ हजार ५ सय ३२ रुपैयाँ,निक्षेप हिसाब संस्थामा बचत रहेको रकम २९ करोड ४० लाख ५६ हजार ४ सय ९ रुपैयाँ,कर्जा तथा सापटी ८ करोड ३८ लाख २२ हजार ८ सय १० रुपैयाँ,अन्य दायित्व तथा व्यवस्था २ करोड ८ लाख ८३ हजार १ सय ४८ रुपैयाँ गरी जम्मा दायित्व ४७ करोड ४३ लाख ४० हजार ७ सय रुपैयाँ रहेको संस्थाका कोषाध्यक्ष हेमराज पाण्डेयले जानकारी दिनुभयो । संगम सहकारीको कुल सम्पत्ति ४७ करोड ४३ लाख ४० हजार ७ सय पुगेको छ ।आर्थिक वर्ष २०८०⁄८१ मा शेयर पुँजी ३ करोड ५० लाख पुग्ने अनुमान गरिएको छ । यस्तै साधारण जगेडा कोष,अन्य कोषहरू,कर्जा जोखिम कोष, निक्षेप, वाह्यकर्जा र अन्य दायित्व तथा व्यवस्थाहरू गरी सम्पत्ति तथा जायजेथा ४७ करोड ४३ लाख ३४ हजारबाट ५९ करोड १५ लाख पुग्ने आँकलन गरिएको छ ।

साधारण सभामा सहकारीको ५ वर्षे वित्तीय आँकडा पनि प्रस्तुत गरिएको थियो  । आर्थिक वर्ष २०८०⁄८१ मा शेयर सदस्य सङ्ख्या २ हजार १ सय ६८ पुग्दा संगम सहकारीलाई १ करोड २० लाख खुद नाफा भएको छ । ३५ करोड ३० लाख ३४ हजार कर्जा लगानी गरिएको छ भने २९ करोड ४० लाख ५६ हजार रकम बचत छ । शेयर रकम भने ३ करोड ११ लाख २५ हजार २ सय छ ।

साधारण सभामा अध्यक्षले प्रस्तुत गरेको प्रतिवेदन, लेखा परीक्षण सम्बन्धी प्रतिवेदन, वार्षिक नीति कार्यक्रम र बजेट,लेखापरिक्षण नियुक्ति सँगै पारिश्रमिक,बाह्य कर्जा र शेयर लाभांश लगायतका विषयमा छलफल भएको थियो ।

सभामा समयमै सहभागी ३० जना शेयर सदस्यहरूलाई गोला प्रथाबाट पुरस्कृत गरिएको थियो । यस्तै फोन पे प्रयोग गर्ने सदस्यहरू मध्येबाट १५ जनालाई गोलाप्रथाद्धारा र फोन पे वाट उत्कृष्ट कारोबार गर्ने सदस्यहरुसँगै संस्थामा कार्यरत उत्कृष्ट कर्मचारीहरूलाई सम्मान गरिएको थियो। संस्थाका उपाध्यक्ष रघुवीर भट्टले स्वागत मन्तव्य राख्नुभएको कार्यक्रमको सञ्चालन संस्थाकी व्यवस्थापक बसन्ती कुमारी ऐरले गर्नुभएको थियो ।

संस्थामा आबद्ध सदस्यहरूको जीवनस्तर सुधार गरी समग्र समाजलाई आर्थिक सामाजिक र सांस्कृतिक रूपले संवृद्ध बनाउने उद्देश्यले २०६९ सालदेखि संगम सहकारी सञ्चालनमा आएको हो । धनगढी उपमहानगरपालिका ४ चटकपुरमा प्रधान कार्यालय रहेको संगम सहकारीले अत्तरिया, मसुरिया,फूलबारी, हसुलिया र धनगढी मोतिचोक गरी ५ वटा सेवा केन्द्र सञ्चालन गरेको छ ।