नेफ्स्कूनको प्राविधिक सहयोगमा एफइसी धनकोष साकोस तिलोत्तमा रुपन्देहीको रणनीतिक व्यवसायिक योजना निर्माण कार्यशााला बर्दियाको ठाकुरद्वारामा सम्पन्न भएको छ । संस्थाका अध्यक्ष तारानाथ कंडेलको अध्यक्षतामा आयोजित उद्घाटन कार्यक्रमका प्रमुख अतिथि नेफ्स्कूनका बरिष्ठ उपाध्यक्ष एवम् प्रवक्ता दामोदर अधिकारी रहनुभएको थियो । माघ ५ र ६ गते सञ्चालित तालिमको सहजीकरण नेफ्स्कूनका तालिम अधिकृत कोमल राज अधिकारीले गर्नुभएको थियो । 

कार्यक्रमका प्रमुख अतिथि नेफ्स्कून बरिष्ठ उपाध्यक्ष अधिकारीले सदस्यहरुको जीवनस्तर उकास्ने गरी संस्थाहरुले योजना निर्माण गर्नुपर्ने भन्दै एएफइसी साकोसलाई पनि त्यही दिशामा कार्यशाला केन्द्रीत गर्न आग्रह गर्नुभयो । उहाँले चुनौतीपूर्ण वर्तमान सामना गर्न मात्रात्मक विकास वा वृद्धि मात्र नभई गुणात्मक वृद्धि र विकासमा योजना केन्द्रित गर्न आग्रह गर्नुभयो । उहाँले नेफ्स्कूनको नवनिर्वाचित सञ्चालक समिति पनि हाल साकोस अभियानमा देखिएका चुनौतीहरु सामना गर्न प्रतिबद्ध भएर लाग्नेमा सहभागीहरुलाई आश्वस्त तुल्याउनुभयो । उहाँले भन्नुभयो, ‘व्यक्तिगत रुपमा म र संस्थागत रुपमा नेफ्स्कून हालका चुनौतीहरु सामना गर्ने गरी काम गर्न लागिपरेका छौं, त्यसका लागि यहाँहरुको साथ सहयोग आवश्यक छ ।’