काठमाडौं । भनिन्छ, कुनै पनि व्यक्तिमा निहित ज्ञान, सीप, अभिवृत्ति र समस्या समाधानको लागि आवश्यक ज्ञान, सीप र अभिवृत्तिबीचको समायोजन नै तालिम हो । तालिमले सम्भावित समस्याहरु समाधान गर्ने तथा विषयवस्तु र सीपमा नवीनता प्रदान गरी व्यक्तिमा निखारता ल्याउँदछ । कार्यसम्पादनमा सक्षमता विकास गर्नु तालिमको उद्देश्य हो । तालिम व्यक्तिको धारणात्मक एवम् व्यावहारिकता परिवर्तनको औजार हो । सहकारीमा शिक्षा, तालिम र सूचनाले सैद्धान्तिक मान्यता समेत प्राप्त गरेको छ । सिद्धान्तहरुको जगमा निर्माण भएका नियमहरुमा तालिमको अपरिहार्यता अटाएका छन् । सोही कारण बचत तथा ऋण सहकारीहरुको केन्द्रीय निकाय नेफ्स्कूनले पनि सदस्य संघ संस्थामा स्वयंसेवी तथा अन्य भूमिकामा रहेकाहरुको क्षमता विकासका लागि तालिमका कार्यक्रमहरु स्थापनाकाल लगत्तैदेखि सञ्चालन गर्दै आएको छ । विषयगत केन्द्रीय संघको रुपमा नेफ्स्कूनको प्रमुख काममध्ये सदस्य संघ संस्थाहरुको आवश्यकता र मागमा आधारित विविध प्रकारका तालिम, शिक्षा र सिकाइका कार्यक्रमहरु सञ्चालन गर्ने पनि हो ।

यसैक्रममा, नेफ्स्कून सदस्य सेवा कार्यालय चितवनको आयोजनामा नवलपुर र चितवनका ३१ साकोसबाट ३५ जनाको सहभागितामा माघ ७ र ८ गते अध्यक्षहरुको क्षमता विकास तालिम भरतपुरमा सम्पन्न भएको छ । तालिम समापनमा नेफ्स्कूनकी उपाध्यक्ष शान्ति अधिकारी सहभागी हुनुभएको थियो । तालिम सहजीकरण नेफ्स्कूनका सहायक कार्यकारी अधिकृत सञ्जयराज तिमल्सिनाले गर्नुभएको थियो भने समग्र व्यवस्थापन संघको सदस्य सेवा कार्यालय चितवनका प्रमुख रिसभराज रेग्मीले गर्नुभएको थियो ।