काठमाडौं  । नेफ्स्कूनको आयोजना एवम् संघको सदस्य सेवा कार्यालय सुनसरीको व्यवस्थापनमा २०८० फागुन २३ देखि २५ सम्म मोरङको लेटाङमा ऋण अधिकृतहरुको क्षमता अभिवृद्धि तालिम–सीयूएलसीसी संचालन गरिएको छ । तालिममा १९ संस्थाबाट २४ जनाको सहभागिता थियो । 

तालिमका सहभागीहरुले साकोसमा सञ्चालक समिति, व्यवस्थापन र भौतिक श्रोत र सधान मात्र भएर हुँदैन त्यसलाई सही व्यवस्थापन र परिचालन गर्न जानिएन भने दुर्घटना हुनसक्ने भन्दै तालिमले संस्थामा रहेको पुँजीलाई सही तवरले परिचालन गर्न धेरै विषयहरु सिकाएको प्रतिक्रिया व्यक्त गर्नुभयो । तालिमबाट सिकाइसँगै काम गर्ने उर्जा थप भएको भन्दै सिकाइ र उर्जालाई प्रयोगमा ल्याउने प्रतिवद्धता जनाउनुभएको थियो ।

समापन कार्यक्रममा नेफ्स्कून संचालक एवं सुनसरी सदस्य सेवा कार्यालय व्यवस्थापन उपसमिति संयोजक लक्ष्मी सापकोटाले नेफ्स्कून सदैव सदस्य संस्थाहरुको क्षमता विकासका कार्यक्रमहरु आयोजना गर्न तत्पर रहेको बताउनुभयो । उहाँले सिकाइलाई संस्थागत व्यवहारमा लागु गर्दै साकोसहरुमा विद्यमान चुनौतीहरु सामना गर्न अनुरोध गर्नुभयो । साकोस संचालन नितान्त प्राविधिक विषय भएकोले संस्थाको समिति र व्यवस्थापन निरन्तर रुपमा शिक्षित भइरहनुपर्ने उहाँको भनाइ थियो । संस्थाका ऋणका सेवाहरु सदस्य केन्द्रित भई सदस्यहरुको जीवनस्तर सुधारको लागि हुनुपर्ने सञ्चालक सापकोटाको सुझाव थियो । 

संघका तालिम अधिकृत कोमल राज अधिकारी र रविन्द्र श्रेष्ठले सहजीकरण गरेको तालिमको समापन कार्यक्रम संचालन तथा व्यवस्थापन व्यवसाय अधिकृत रामकृष्ण भट्टराई र लेटाङ सेवा केन्द्र प्रमुख गणेश भण्डारीले गर्नुभएको थियो ।