शुक्रबार ५ भदौ, २०८३, Fri, 21 Aug, 2026
काठमाडौं । नेफ्स्कून न्युरोड सदस्य सेवा कार्यालयको आयोजनामा ६७ औं राष्ट्रिय सहकारी दिवस २०८० शुभकामना आदानप्रदानसँगै अन्तरक्रिया कार्यक्रम गरी मनाइएको छ । सहकारीमा सुशासन : प्रविधि र एकीकरण भन्ने यस वर्षको सहकारी दिवसको थिममा आधारित रही आयोजित कार्यक्रममा विभिन्न संघ संस्थाबाट ४७ जनाको सक्रिय सहभागिता रहेको थियो ।
कार्यक्रममा नेफ्स्कून संचालक एवम् न्युरोड सदस्य सेवा कार्यालय संयोजक खेमराज सुवेदीले संघको सञ्चालक समितिको १ सय दिन पुरा भएको अवसरमा जारी गरिएको प्रेस विज्ञप्ति वाचन गरी त्यस विषयमा थप प्रस्ट पार्नुभएको थियो । उहाँले संघको सञ्चालक समितिले निर्वाचित भइसकेपछि प्राप्त गरेका उपलब्धि, भएका बहसपैरवी र अघि बढाइएका कामहरु आदिबारे जानकारी गराउँदै सदस्य संघ संस्थाहरुको राय लिई आगामी दिनमा थप उपलब्धि हासिल गर्ने विश्वास व्यक्त गर्नुभयो । उहाँले सदस्यहरुको भावना प्रतिविम्बित हुने गरी नेफ्स्कूनले काम गर्नेमा सबैलाई आश्वस्त तुल्याउनुभयो ।
कार्यक्रममा लगानीको सुरक्षा, तरलता व्यवस्थापनमा संघको भूमिका, नीतिगत सवालहरु, सदस्य संघ संस्थाहरुको अनुगमन तथा सुपरीवेक्षण, संघका सेवाहरु, तालिम तथा शिक्षा लगायत समग्र विषयमा सघन अन्तरक्रिया भएको थियो ।
