काठमाडौं । सदस्यहरुलाई उद्यमी बनाउने उद्देश्यका साथ चितवनको प्रभात दिदीबहिनी साकोसले आजबाट औपचारिक रुपमा व्यवसाय विकास सेवा कक्ष 'बीडीएस डेस्क' स्थापना गरेको छ ।सदस्यहरुलाई आवश्यकता र परियोजनाका आधारमा साना, मझौला तथा ठूला उद्यम स्थापनाका लागि परामर्श, सीप, पुँजी र प्रविधि लगायत उपलब्ध गराउन 'बीडीएस डेस्क' सहयोगी हुने विश्वास साकोसले लिएको छ ।

आज एक कार्यक्रमका बीच नेफ्स्कूनकी उपाध्यक्ष शान्ती अधिकारीको प्रमुख आतिथ्यतामा बीडीएस डेस्क विधिवत् सञ्चालन गरिएको हो । कार्यक्रममा साकोसकी अध्यक्ष साधना श्रेष्ठ, चितवन बचत संघका उपाध्यक्ष, बागमती प्रोस्कून शिक्षा उपसमिति सदस्य, नेफ्स्कून चितवन सदस्य सेवा केन्द्रका इन्चार्ज रिसभराज रेग्मी लगायत साकोसको सञ्चालक तथा उपसमितिका अधिकारीहरुको उपस्थिति थियो । साकोसले आजै २०८१ सालको अग्रिम शुभकामनासहित संस्थागत क्यालेन्डर पनि विमोचन गरेको छ ।

बीडीएस डेस्कबाट साकोसका सदस्यहरुलाई उद्यमसँग जोडिने प्रेरणा र हौसलासँगै अन्य पूर्वाधारहरु विकासमा टेवा पुग्ने साकोसले जनाएको छ । बचत तथा ऋण सहकारीहरुले सदस्यहरुलाई उद्यमी बनाउनुपर्छ भन्ने यसको अभिप्राय हो ।

उत्पादन, आयआर्जन, स्वरोजगार र व्यक्तिगतदेखि स्थानीय आवश्यकता सम्बोधनका लागि उद्यमशीलता प्रवर्धनको आवश्यकतालाई बुझेर नेफ्स्कून र USAID Trade and Competitiveness बीचको साझेदारीमा कार्यक्रम अन्तर्गत प्रभात दिदीबहिनी साकोसमा बीडीएस डेस्क स्थापना गरिएको हो । राष्ट्रिय आवश्यकताबोध गर्दै स्थानीय रुपमा हरसम्भव प्रयास गर्न नेफ्स्कूनले साझेदारीमा सञ्चालन गरेको यो अभियानमा जोडिन पाउँदा खुसी लागेको साकोसले जनाएको छ । 

उक्त अवसरमा सदस्यहरुको उत्पादन पनि प्रदर्शन गरिएको थियो ।