काठमाडौं । चन्द्रागिरि साकोसको उमन्स क्रिएशन सेवा केन्द्र अन्तर्गत उमन्स क्रिएशन उद्यमी महिला समूहद्वारा वैशाख २९ गते लघुउद्यमी मेला आयोजना गरिएको छ। बुढानिलकण्ठ न.पा. वडा नं ६ गणेश चोकमा रहेको सेवाकेन्द्रको प्राङ्गणमा प्रत्येक महिनाको अन्तिम शनिबार उद्यमी मेला आयोजना हुँदै आइरहेको छ ।  

संस्थाका सदस्यहरुले आ–आफ्ना वस्तु, सेवा र उत्पादनहरुको प्रदर्शनी गरिने मेलाले स्थानीयहरुको सहभागितामा बजारीकरणमा सहयोग पुग्ने गरेको छ । यस्तो मेला स्थानीय उत्पादहरुको विनिमय हुने ठाउँ मात्र होइन बजारलाई चलायमान बनाउने, सम्बन्धहरु प्रगाढ बनाउने, नयाँ सम्भावनाहरु खोज्ने र सहकारिताको अभ्यास गर्ने माध्यम पनि भएको चन्द्रागिरि साकोसले जनाएको छ ।  

चन्द्रागिरि साकोसले समय समयमा विभिन्न कार्यक्रमको अवसरमा सदस्यहरुको वस्तु, सेवा र उत्पादनहरुको प्रदर्शनीमा सहजीकरण गर्दै आइरहेको छ र सदस्यहरुको सीपको डाटाबेस समेत तयार गरेको छ ।

यसैबीच, साकोसले चन्द्रागिरि नगरपालिकामा अवस्थित मुख्य कार्यालय, दहचोक सेवाकेन्द्र, ललितपुर जिल्लाको शुभतारा सेवाकेन्द्र तथा पाटन सेवाकेन्द्र अन्तर्गतका सदस्यहरुमा पनि यस प्रकारको उद्यमी मेला आयोजना गर्ने ईच्छा भए सहजीकरण गर्ने समेत जनाएको  छ ।