काठमाडौं । ललितपुर जिल्ला बचत तथा ऋण सहकारी संघको आयोजनामा यही जेठ १८ र १९ गते साकोस कोषाध्यक्ष गोष्ठी २०८१  हुँदैछ । सहकारी संस्थाको संस्थागत विकासका लागि कोषाध्यक्षको महत्व, भूमिका र जिम्मेवारीका विविध विषय समेट्दै धुलिखेलमा २ दिवसीय आवासीय गोष्ठी गर्न लागिएको संघले जनाएको छ । कतिपय सहकारीमा संचालकहरुले आफ्नो भूमिका नबुझेर पनि समस्या आइरहेकोले सहकारीमा कोषाध्यक्षको भूमिका, जिम्मेवारी र दायित्व बारे जानकारी दिन गोष्ठीले महत्वपूर्ण भूमिका खेल्ने संघको दाबी छ ।

संघले यसअघि अध्यक्ष तथा लेखा समितिका विषयमा गोष्ठी गरिसकेको र संस्थामा कोषाध्यक्षको भूमिकालाई थप सक्रिय बनाउन संघले गोष्ठी आयोजना गर्न लागेको हो । गोष्ठीमा पूर्व अर्थ मन्त्रीसँगै नेपाल राष्ट्र बैंकलगायतका निकायका विषय विज्ञबाट कार्यपत्र प्रस्तुत हुने र वृहतरुपमा छलफलको सेसन संचालन गरिने जनाइएको छ । सहकारीमा कोषाध्यक्षको भूमिका लाई लिएर पहिलो पटक यस किसिमको गोष्ठी आयोजना हुन लागेको संघले दाबी गरेको छ । गोष्ठीमा एकसय सहकारीका कोषाध्यक्षहरु सहभागी गराइने भन्दै समयमा नै नाम दर्ता गराउन पनि संघले आग्रह गरेको छ ।  सहभागिता दर्ता फारम संघको वेबसाइटबाट डाउनलोड गर्न सकिने छ ।