काठमाडौं । राष्ट्रिय सहकारी महासंघले सहकारी क्षेत्रमा दक्ष युवा जनशक्ति आकर्षणमार्फत बेरोजगारी समस्या समाधानमा भूमिका निर्वाह गर्ने उद्देश्यले सहकारी रोजगार मेला आयोजना गर्ने भएको छ । आगामी असार ७ देखि ९ गतेसम्म महासंघ परिसरभित्र पहिलो सहकारी रोजगार मेला आयोजना गर्ने निर्णय गरिएको हो । महासंघ सञ्चालन समितिको बैठकले सहकारी रोजगार मेला आयोजनाको निर्णय गरेको हो । 

बैठकले नेपाल सरकार, केन्द्रीय सहकारी संघहरु, राष्ट्रिय सहकारी बैंकलगायत सहकारी संघ/संस्था तथा निकायहरुसँगको सहयोग र समन्वयमा मेला आयोजना गर्ने निर्णय गरेको हो । साथै महासंघले सहकारी क्षेत्रमा आइपर्ने समस्या एवं चुनौतीहरु समाधानमा समन्वय तथा सुझावका लागि विज्ञ समूह गठन गर्ने निर्णय गर्दै त्यसको संचालन विधि समेत पास गरेको छ ।