गणतन्त्र दिवसको अवसरमा २०८१ जेठ १५ गते मंगलबार कास्की जिल्लाको माछापुच्छ्रे गाउँपालिका वडा नं-२ स्थित सार्दिखोला बचत तथा ऋण सहकारी संस्थामा रक्तदान कार्यक्रम आयोजना गरिएको छ । सार्दिखोला बचत तथा ऋण सहकारी संस्था लि.द्धारा आयोजित सो कार्यक्रमको उद्घाटन प्रमुख अतिथि तथा माछापुच्छ्रे गाउँपालिका वडा नं २ का अध्यक्ष गणेश आचार्यले पहिलो रक्तदातालाई ब्लड ब्याग हस्तान्तरण गरी गर्नुभएको थियो । 

प्रमुख अतिथि आचार्यले सार्दिखोला बचत तथा ऋण सहकारी संस्थाले गर्दै आईरहेको संस्थागत सामाजिक उतरदायित्व अन्तर्गतका कार्यक्रमले स्थायनीहरुमा सकारात्मकता फैलाउनुका साथै रगत अभाव नहोस् भन्ने हेतुले कार्यक्रम आयोजना गरेकोमा संस्थालाई धन्यवाद दिनुका साथै भविष्यमा अझ उत्कृष्ठ कार्यक्रमहरुको लागि पनि सुझाव प्रदान गर्नुभएको थियो । 

कार्यक्रमको उद्घाटन सत्र संस्थाका सचिव राम प्रसाद आचार्यले सञ्चालन गर्नुभएको थियो । कार्यक्रममा ५३ युनिट रगत संकलन गरी प्रादेशिक रक्तसंचार सेवा, पोखरालाई हस्तान्तरण गरियो । कार्यक्रमको सभापतित्व संस्थाका अध्यक्ष सर्वजित गुरुङले गर्नुभएको थियो ।