बाँके । नेफ्स्कून बाँके सदस्य सेवा कार्यालयको आयोजनामा “सम्भावित सदस्य अभिमुखिकरण” कार्यक्रम सम्पन्न भएको छ । कार्यक्रममा बाँके र बर्दिया जिल्लाका १४ संस्थाबाट सहभागी २९ जनामध्ये १२ महिला प्रतिनिधित्व थियो । 
सहभागीहरुले विषयगत केन्द्रीय अभिभावक संघ नेफ्स्कूनको इतिहास, उपलब्धि र सदस्य सेवाका कार्यक्रमहरुबारे अभिरुचिपूर्वक जानकारी लिनुभएको थियो । साथै सहभागी संस्थाहरुबाट छिटै संघमा आवद्ध हुने प्रतिवद्धता समेत व्यक्त भएको थियो । यस्तै, समय सान्दर्भिक कार्यक्रमको आयोजना गरेर महत्वपूर्ण सिकाइ भएको भन्दै संघले तालिम शिक्षाका कार्यहरुलाई निरन्तर दिनु पर्ने धारण पनि सहभागीहरुको थियो । एक महिला र पुरुष सहभागीले कार्यक्रम एकदमै प्रभावकारी र फलदायी रहेको प्रतिक्रिया व्यक्त गर्नुभएको थियो । 

कार्यक्रममा नेफ्स्कूनका बाँके सदस्य सेवा कार्यालय व्यवस्थापन उपसमिति सदस्य एवम जिल्ला बचत तथा ऋण सहकारी संघ लि. बाँकेका अध्यक्ष प्रेम शाह, संघका बाँके सदस्य सेवा कार्यालय व्यवस्थापन उपसमिति सदस्य एवम प्रदेश बचत तथा ऋण सहकारी संघ की उपाध्यक्ष मिना सिग्देल र संघको बाँके सदस्य सेवा कार्यालय व्यवस्थापन उपसमितिका सदस्य कृष्णा पाठकले विषम् परिस्थितिमा सहकारी संस्थाले सदस्य र ऋणीहरुलाई नियमित भेटघाट सम्बन्ध बिस्तार गर्नुका साथै ऋण असुलीलाई विशेष प्राथमिकतामा राख्नुपर्ने सुझाव राख्नुभयो । उहाँहरुले यस प्रकारको कार्यक्रमले सहकारीप्रति सदस्यहरुको विश्वास पुनःजागृत गराइ अवस्था सुधारमा सकारात्मक परिवर्तन ल्याउने विश्वास ब्यक्त गर्नुभयो ।

संघका बाँके सदस्य सेवा कार्यालय ईन्चार्ज छत्र प्रसाद धमलाले नेफ्स्कूनको परिचयसँगै सहकारीका वर्तमान जोखिमहरु र समाधानका उपायहरुबारे प्रस्तुतीकरण गर्नुभएको थियो । नेफ्स्कून बाँके सदस्य सेवा कार्यालयका सूचना प्रविधि सहायक बम बहादुर पुन मगरले उद्घाटन सत्र सञ्चालन गर्नुभएको थियो भने कार्यक्रम व्यवस्थापनसँगै समापन सत्र कार्यालय सहायक पुष्पराज तिमिल्सैनाले सञ्चलान गर्नु भएको थियो ।