काठमाडौं । नेपाल जीवनस्तर सर्वेक्षण चौथो २०७९/८० को विस्तृत प्रतिवेदन अनुसार सहकारी संस्थामा पहुँच भएको जनसङ्ख्या हाल ८३ दशमलव ३ प्रतिशत रहेको छ । बैंकको पहुँचमा भएको जनसङ्ख्या भने ७४ दशमलव २ प्रतिशत छ । 

राष्ट्रिय तथ्याङ्क कार्यालयले जेठ ३१ गते नेपाल जीवनस्तर सर्वेक्षण चौथो विस्तृत तथ्याङ्कीय प्रतिवेदन सार्वजनिक गरेको हो । जनताको जीवनस्तर मापन गरी देशमा रहेको गरिबीको अवस्था थाहा पाउन जीवनस्तर सर्वेक्षण सञ्चालन गरिन्छ । 

सर्वेक्षण अनुसार हालको न्यूनतम आधारभूत आवश्यकताको औसत लागत रु.७२ हजार ९ सय ८ बराबर छ । अर्थात् हरेक नेपालीले आफ्नो आधारभूत आवश्यकता पूर्ति गर्न वार्षिक सो रकम खर्च गर्दछन् । सोमध्ये खाद्य आवश्यकता पूर्ति गर्न रु. ३५ हजार २९ र गैरखाद्य आवश्यकता पूर्ति गर्न रु. ३७ हजार आठ सय ७९ बराबर खर्च गर्ने गरेका छन् ।