भैरहवा । सहकारीका सदस्यहरुको उद्यमशीलता विकास गरी आत्मनिर्भर बनाउन बजारीकरण सीप विकास अभिमुखीकरण कार्यक्रम रुपन्देहीको भैरहवामा सम्पन्न भएको छ । नेपाल बचत तथा ऋण केन्द्रीय सहकारी संघ (नेफ्स्कून) र अन्तर्राष्ट्रिय विकासका लागि अमेरिकी सहयोग नियोग (युएसएड) को संयुक्त आयोजनामा बुधबार र बिहीबार दुईदिन कार्यक्रम भएको हो।  यस्तो कार्यक्रम चारवटा प्रदेशमा सम्पन्न भइसकेको छ ।

वक्ताहरुले सहकारीमा बजारीकरण अझ जरुरी रहेको बताउँदै कार्यक्रमले व्यवसाय विस्तारमा केही सहजता भयो भने उपलब्धि हुने बताउनुभयो । व्यवसायीलाई प्रतिष्पर्धी कसरी बनाउन सकिन्छ भन्ने कार्यक्रमको उद्देश्यमाथि प्रकाश पार्दै बीडीएस डेस्कमार्फत व्यवसायलाई राम्रो बनाउन सहयोग गर्न सकिने धारणा उहाँहरुले राख्नुभयो । तालिममा सिकेका कुराहरु कार्यान्यवन नगरे यसको औचित्य प्रमाणित नहुने बताउँदै वक्ताहरुले सिकेका कुरा उद्यमशीलतामा प्रयोग गर्न आग्रह गर्नुभयो । 

कार्यक्रममा नेफ्स्कूनका अध्यक्ष चन्द्रप्रसाद ढकाल, सञ्चालक सदस्य ज्ञानु पौड्याल, प्रदेश बचत तथा ऋण सहकारी संघ लुम्बिनी प्रदेशका अध्यक्ष कृष्ण नेपाल, रुपन्देही बचत तथा ऋण सहकारी संस्था लि. का अध्यक्ष बसन्त ढकाल, नेफ्स्कून रुपन्देही सेवा कार्यालय उपसमिति सदस्य मीन प्रसाद पोखरेल, युएसएडका प्रतिनिधि सञ्जय झा लगायतले धारणा राख्नुभएको थियो । कार्यक्रममा ५४ जनाको सहभागिता थियो ।