काठमाडौं । आज आर्थिक वर्षको अन्तिम दिन । २०८१ असार सोमबार आर्थिक वर्ष २०८० र ८१ को अन्तिम कारोबार दिन हो । बार्षिक खाताबन्दीको दिन भएकाले सहकारी संघ संस्थाहरु पनि यो वर्षको कारोबारलाई कसरी सुखद, सफल र सकारात्मक बनाउन सकिन्छ भनेर लागिपरेका छन् । यसका लागि उनीहरुले आफ्ना सदस्यहरुलाई असार मसान्त सम्ममा तिर्नुपर्ने हिसाब मिलान गरिदिन आग्रह गरेका छन् । आर्थिक वर्षान्त भएकाले उनीहरुले सदस्यहरुलाई यस्तो विशेष आग्रह गरेका हुन् ।

संस्थाको वर्षान्तको खाताबन्दीलाई सफल र सकारात्मक बनाउन उनीहरुले खासगरी ऋणी सदस्यहरुलाई आग्रह गरेका हुन् । यसका लागि संस्थाले आफ्नो आधिकारिक सामाजिक सञ्जालका साथै सञ्चालक समिति तथा कर्मचारीहरुले आफ्नो व्यक्तिगत सामाजिक सञ्जालबाट पनि सूचना, जानकारी र आग्रह सम्प्रेषण गरेका छन् । 

कति सहकारीहरुले  एकदमै भावनात्मक रुपले त कतिले कानूनी प्रबन्धहरुबारे पुनःस्मरण गराउँदै ऋणी सदस्यहरुलाई आज अन्तिम दिन भएपनि संस्थाको सम्पर्कमा आइ हिसाब मिलान गर्न आग्रह गरेका छन् । 

रुपन्देहीको जनउत्थान साकोसले आफ्नो सामाजिक सञ्जालमा लेखेको छ, ‘तपाईले लगेको ऋण कसैको पसिना हो ।’ जनउत्थान साकोसले सदस्यहरुलाई संस्था सम्झन, आफ्नो दायित्व बुझ्न र आफ्नै परिवारका अन्य सदस्यको दुःखजिलो गरेको बचत सम्झन आग्रह गरेको हो ।

यसरी आफ्नै परिवारका सदस्यहरुको बचतसँग खेलबाड नगर्न आग्रह गर्दै जनउत्थानले असल अनुशासित सेयर सदस्य बन्न आग्रह गरेको हो । नियमित मासिक बचत, ऋणको ब्याज र किस्ता समयमै भुक्तान गरी असल र अनुशासित सेयर सदस्य बन्न जनउत्थानले सेयर सदस्यहरुलाई आग्रह गरेको छ ।

यस्तै, काठमाडौंको सुयोग्य साकोसले आफ्नो सामाजिक सञ्जालमा पोष्ट गरेको छ, ‘ऋणलाई समयमै भुक्तान गर्नु भनेको आफ्नो वित्तीय प्रतिष्ठा र व्यक्तिगत सम्मानको रक्षा गर्नु हो ।’ 

रौतहटको विन्दबासिनी बचत तथा ऋण सहकारी संस्थाका व्यवस्थापक जर्नादन कोइराला आफ्नो फेसबुक पेजमा लेख्नुहुन्छ, ‘सहकारी संस्थामा सेयर सदस्य भनेको मालिक हो । अनि मालिकले आफ्नो संस्थाबाट लगेको ऋणको किस्ता र ब्याज तिर्नुहोस् भनेर कर्मचारीले हरेक दिन भन्नुपर्ने ?’ जस्तो सुकै कठिन समय र परिस्थितिमा सहकारीले सहयोग गरेको भन्दै त्यो कुरा नबिर्सन उनीहरुले समयमै ऋण नतिर्ने वा अटेरी  गर्ने सदस्यहरुलाई सजग गराएका छन् ।

तिर्न सक्नेहरुले पनि अटेरी गरेको, ऋण तिर्नुपर्दैन भन्ने अफवाहमा लागेको र अवस्था कठिन हुनेहरु पनि सम्पर्कमा नआएको वा संस्थाले बारम्बार गरेको ताकेतालाई बेवास्ता गरेको विषय सहकारी संस्थाहरुले स्मरण गराएका हुन् ।

साँच्चिकै समस्यामा परेका ऋणी सदस्यहरुलाई उनीहरुको अनुरोध छ– समस्या छ भने आउनुहोस्, सल्लाह गरौं, समाधान गरौं तर ऋणको भाखा नघाएर नबसौं । काठमाडौंको चन्द्रागिरि साकोसले आफ्नो फेसबुक वालमा यस्तो लेखेको छ, ।

कास्कीको पोखरा रोयल साकासले ऋण सेवा उपभोग गरिरहेका सदस्यहरुको नाममा जरुरी सूचना जारी गर्दै भनेको छ, ‘संस्थाको वार्षिक लक्ष्य तथा योजना सफल बनाउन सदस्यहरुबाट यो महिना हुने योगदान अविष्मरणीय, अतुलनीय र प्रशंसनीय रहनेछ  । तसर्थ संस्थाबाट ऋण सेवा लिई विभिन्न पेसा व्यवसाय सञ्चालन गरिरहनुभएका आदरणीय सदस्यज्यूहरुलाई सदाका बर्षहरुमा झैं आफूले तिर्न बुझाउन पर्ने साँवा ब्याज २०८१ असार मसान्तभित्र बुझाई असल सदस्यको पहिचान बनाउनुहुन र सहकारीमा कारोबार गरेबापत संरक्षित पुँजी फिर्ता कोषबाट प्राप्त हुने लाभको असली हकदार बन्नुहुन समेत यो सूचना जारी गरिएको छ ।’

यसैगरी, देशैभरिका सहकारी संघसंस्थाहरुले विभिन्न सूचना, जानकारी र सचेतना मार्फत ऋणको भाखा नघाएका सदस्यहरुलाई भनिरहेका छन्, ‘सदस्यज्यूहरु, आज असार मसान्त हो नि !'