काठमाडौं । प्रधानमन्त्री केपी शर्मा ओली नेतृत्वको नवगठित मन्त्रिपरिषदमा भूमि व्यवस्था, सहकारी तथा गरिबी निवारण मन्त्रालयको जिम्मा बलराम अधिकारीले पाउनुभएको छ । प्रधानमन्त्री ओलीले अधिकारीलाई भूमि व्यवस्था, सहकारी तथा गरिबी निवारण मन्त्रीमा आज नियुक्त गर्नुभएको हो । यसअघि पुष्पकमल दाहाल नेतृत्वको मन्त्रिपरिषदमा पनि अधिकारी सोही मन्त्रालयको जिम्मेवारीमा रहनुभएको थियो । 

यसैबीच, राष्ट्रपति रामचन्द्र पौडेलबाट हिजो प्रधानमन्त्री नियुक्त केपी शर्मा ओलीले आज पद तथा गोपनीयताको शपथ लिनुभएको छ । केही समयअघि शीलतनिवासमा आयोजित समारोहमा राष्ट्रपति रामचन्द्र पौडेलले नवनियुक्त प्रधानमन्त्री ओलाीलाई शपथ गराउनुभएको हो । लगत्तै दुई उपप्रधानमन्त्रीसहित नवनियुक्त २१ मन्त्रीको पद तथा गोपनीयताको शपथ कार्यक्रम समेत सम्पन्न भएको छ ।

अघिल्लो सरकारको पालामा २०८० फागुन २३ गते भूमि, व्यवस्था, सहकारी तथा गरिबी निवारण मन्त्रालयको पदभार सम्हाल्नुभएका मन्त्री अधिकारीले आफ्नो १ सय दिनको उपलब्धि समेत सार्वजनिक गर्नुभएको थियो । 

विसं २०१७ साउन ४ गते कास्कीको मादी गाउँपालिका गोर्देमा जन्मिनुभएका मन्त्री अधिकारी राजनितिक आन्दोलनका क्रममा चार पटक हिरासतमा रहनुभएको थियो । शिक्षण पेसा हुँदै राजनीतिमा लाग्नुभएका मन्त्री अधिकारीले २०३४ सालदेखि लमजुङ र कास्कीमा विद्यार्थी राजनीति थाल्नुभएको थियो  । 

कपिलवस्तुको शिवराज नगरपालिका–९ सुन्दरीडाँडास्थित प्रकाश माविमा उहाँ १० वर्ष शिक्षण पेशामा आवद्ध हुनुभएको थियो । मन्त्री अधिकारी २०७० मा कपिलवस्तु क्षेत्र नं १ बाट संविधानसभा सदस्यमा विजयी हुनुभएको थियो । उहाँ २०७९ सालमा पनि कपिलवस्तु क्षेत्र नं १ बाट प्रतिनिधिसभा सदस्यमा निर्वाचित हुनुभएको हो ।