काठमाडौं । नवनियुक्त भूमि व्यवस्था, सहकारी तथा गरिबी निवारण मन्त्री बलराम अधिकारीलाई नेफ्स्कूनका तर्फबाट हार्दिक बधाई सहित कार्यकाल सफलताको शुभकामना व्यक्त गरिएको छ । नेफ्स्कूनका अध्यक्ष चन्द्रप्रसाद ढकालले आज नवनियुक्त मन्त्री अधिकारीलाई उहाँकै कार्यकक्षमा भेटी अभियानको तर्फबाट हार्दिक बधाई सहित आगामी कार्यकाल सफलताको अग्रिम शुभकामना व्यक्त गर्नुभएको छ ।

सहकारी मन्त्रालयमा दोस्रो कार्यकाल सुरु गर्नुभएका मन्त्रीलाई व्यस्तताका बीच अध्ययक्ष ढकालले बधाईसहित शुभकामना व्यक्त गर्नुभएको जानकारी गराउनुभयो । 

अध्यक्ष ढकालले भन्नुभयो, ‘मन्त्रीज्यूको व्यस्तताका बाबजूद संक्षिप्त भेट गरी बधाई दिने अवसर मिलेको छ । उक्त अवसरमा मन्त्रीज्यूले सहकारी अभियानका विषयमा अघिल्लो कार्यकालमा अघि बढाइएका विषयलाई अब थप सक्रियताका साथ द्रुतगतिमा नतिजा आउने गरी काम गर्ने विश्वास दिलाउनुभएको छ ।’

अभियानसँग निकट रहेर काम गर्नुभएका मन्त्री अधिकारी पुनः उही जिम्मेवारीमा दोहोरिनुभएसँगै अभियानका जल्दाबल्दा विषयमा नतिजा आउने गरी काम गर्ने अवसर प्राप्त भएको नेफ्स्कूनका अध्यक्ष ढकालले बताउनुभयो । उहाँले भन्नुभयो, ‘सहकारी अभियाका पछिल्ला घटनाक्रमबारे गहिरो बुझाई राख्नुभएका मन्त्रीज्यू दोहोरिनुभएसँगै अभियान निक्कै आशावादी भएको छ ।’ 

आज मन्त्री नियुक्त भएसँगै पद तथा गोपनीयताको शपथ लिएर आजै मन्त्री अधिकारीले मन्त्रालयमा गई पदभार ग्रहण गर्नुभएको हो । प्रधानमन्त्री केपी शर्मा ओली नेतृत्वको नवगठित मन्त्रिपरिषद्मा भूमि व्यवस्था, सहकारी तथा गरिबी निवारण मन्त्रालयको जिम्मा बलराम अधिकारीले पाउनुभएको हो ।

प्रधानमन्त्री ओलीले अधिकारीलाई भूमि व्यवस्था, सहकारी तथा गरिबी निवारण मन्त्रीमा आज नियुक्त गर्नुभएको हो । यसअघि पुष्पकमल दाहाल नेतृत्वको मन्त्रिपरिषद्मा पनि अधिकारी सोही मन्त्रालयको जिम्मेवारीमा रहनुभएको थियो । 

अघिल्लो सरकारको पालामा २०८० फागुन २३ गते भूमि, व्यवस्था, सहकारी तथा गरिबी निवारण मन्त्रालयको पदभार सम्हाल्नुभएका मन्त्री अधिकारीले आफ्नो १ सय दिनको उपलब्धि समेत सार्वजनिक गर्नुभएको थियो । 

विसं २०१७ साउन ४ गते कास्कीको मादी गाउँपालिका गोर्देमा जन्मिनुभएका मन्त्री अधिकारी राजनितिक आन्दोलनका क्रममा चार पटक हिरासतमा रहनुभएको थियो । शिक्षण पेसा हुँदै राजनीतिमा लाग्नुभएका मन्त्री अधिकारीले २०३४ सालदेखि लमजुङ र कास्कीमा विद्यार्थी राजनीति थाल्नुभएको थियो  । 

कपिलवस्तुको शिवराज नगरपालिका–९ सुन्दरीडाँडास्थित प्रकाश माविमा उहाँ १० वर्ष शिक्षण पेशामा आवद्ध हुनुभएको थियो । मन्त्री अधिकारी २०७० मा कपिलवस्तु क्षेत्र नं १ बाट संविधानसभा सदस्यमा विजयी हुनुभएको थियो । उहाँ २०७९ सालमा पनि कपिलवस्तु क्षेत्र नं १ बाट प्रतिनिधिसभा सदस्यमा निर्वाचित हुनुभएको हो ।