काठमाडौं । देशभरका विभिन्न सहकारीहरुले नयाँ आर्थिक वर्षको पहिलो दिन साउन १ गते व्यवस्थापनलाई कार्य विवरण हस्तान्तरण गरेका छन् । संघ संस्थाले आफ्नो कार्यविधि, वार्षिक कार्यक्रम र बजेटमा आधारित लक्ष्यसहितको कार्यविवरण नयाँ आर्थिक वर्ष २०८१ ८२ सुरु भएको पहिलो दिनबाट नै कार्यान्वनका लागि व्यवस्थानलाई हस्तान्तरण गरेका हुन् । 

यस्तो असल अनि अनुकरणीय अभ्यासले सहकारी संघ संस्थाको व्यवस्थापनलाई नयाँ आर्थिक वर्षको ‘डे वनबाटै ड्युटीफूल’ बनाउने विश्वास गरिन्छ । अघिल्लो आर्थिक वर्षलाई सफल र सुखद बिदाई गरेसँगै नयाँ आर्थिक वर्षका लागि आफ्नो कामप्रति जिम्मेवार बनाउने उद्देश्य यस्तो अभ्यासको रहेको हुन्छ ।

संस्थाले एक आर्थिक वर्षभरि हासिल गर्ने उपलब्धि समेटिएको बार्षिक योजनाको लक्ष्य र त्यसको प्राप्तिका लागि प्रत्येक कर्मचारीले गर्नुपर्ने कामहरु, निर्वाह गर्नुपर्ने भूमिका, अनुभूत गर्नुपर्ने दायित्व र बोध गर्नुपर्ने जिम्मेवारी आदि समेटिएको मात्रात्मक र गुणात्मक लक्ष्यसहितको जानकारी नै कार्यसम्पादन विवरण हो । सहकारीहरुले नीति र विधिलाई व्यावहारिक रुपमा आत्मसात गरिएको यो असल अनि अनुकरणीय अभ्यास हो ।

विगत लामोसमयदेखि धेरे सहकारीहरुले आफ्नो वार्षिक बजेटसहित कार्य सम्पादन गर्नुपर्ने विवरण व्यवस्थापनलाई नयाँ आर्थिक वर्षको डे वनबाटै हस्तान्तरण गर्ने प्रचलन बढ्दो छ । सहकारीहरुको यस्तो नीतिगत व्यवस्था र त्यसको अक्षरशः कार्यान्वयन अभ्यासले व्यवस्थापनलाई स्वउत्प्रेरित गर्दछ ।

त्यही कार्यविवरण र लक्ष्यको आधारमा कार्यसम्पादन मूल्याङ्कन गर्ने प्रचलन छ । सहकारीहरुमा व्यावसायिकता, जवाफदेहिता, विश्वसनीयता र छवि निर्माणका लागि लागि यस्तो असल अभ्यास गरिन्छ । यसले कर्मचारीहरुलाई आफ्नो कामप्रति खबरदारी र लक्ष्य प्राप्तिका लागि आत्मसमीक्षा, आत्मविश्लेषण र स्वमूल्याङ्कनको अवसर पनि प्रदान गर्दछ । यसैगरी, व्यवस्थापन समूहमा स्वस्थ प्रतिस्पर्धाको वातावरण निर्माण गर्दछ ।

सञ्चालक समितिबाट पारित भएको नयाँ आर्थिक वर्षको वित्तीय लक्ष्यसहितको कार्यसम्पादन विवरण सञ्चालक समितिबाट व्यवस्थापन प्रमुखलाई र बाँकी व्यवस्थापन समूहलाई व्यवस्थापन प्रमुखबाट हस्तान्तरण गर्ने प्रचलन छ । 

सहकारी संघ संस्थाहरुले यस्तो असल अभ्याससम्बन्धी तस्बिर र संक्षिप्त जानकारी आफ्ना सामाजिक सञ्जाल (खासगरी फेसबुक) मार्फत सार्वजनिक गरेका छन् ।