काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्रप्रसाद ढकालले ऋण असुली न्यायाधिकरण यो महिना भित्रमा आइसक्ने बताउनुभएको छ । जागृत कुशादेवी साकोसको आयोजनामा साकोसकी अध्यक्ष कमला अधिकारीको अध्यक्षतामा आज भएको कार्यक्रमका प्रमुख अतिथि ढकालले सहकारी ऐनले व्यवस्था गरेको ऋण असुली न्यायाधिकरण अब धेरै लामो पर्खाइको विषय नहुनेमा सहभागीहरुलाई आश्वस्त पार्नुभएको हो ।

यसैगरी, उहाँले सञ्जाल साझेदारीको विषय द्रुत रुपमा अघि बढेको, लीडरशीप बुटक्याम्प, रणनीतिक व्यावसायिक योजना निर्माण सम्पन्न भई लागू भएको, ऋण असुलीलाई तीब्रता दिइएको भन्दै केन्द्रीय संघका पछिल्ला गतिविधिहरुबारे  सहभागीहरुलाई जानकारी गराउनुभएको हो । साथै, उहाँले नेफ्स्कूनले विकास गरेको जोखिममा आधारित साकोस सुपरिवेक्षण कार्यक्रम (कर्ब्स) सहकारी विभागबाट प्रमाणीकरण गराइने समेत जानकारी गराउनुभयो ।

 उहाँले सहकारीमार्फत नै सदस्य र समुदायका यावत समस्या समाधान गर्न सकिने विश्वास व्यक्त गर्दै अभियानको नेतृत्वले यो कुरा देख्नु र बुझ्नुपर्ने बताउनुभयो । 

नेफ्स्कून अध्यक्ष ढकालले सहकारिता र स्वयंसेवी भावना फरक विषय नभएको भन्दै यदि पृथक ठानियो भने सहकारी दुब्लाउने बताउनुभयो । उहाँले सहकारिता, स्वयंसेवी भावना र क्षमतावान कर्मचारी भएमा संस्था सशक्त बन्ने बताउनुभयो । कार्यक्रममा जागृत कुशादेवी साकोसका बिशिष्ट सल्लाहकार इन्द्र अधिकारीले स्वागत मन्तव्य राख्नुभएको थियो ।

व्यवस्थापन भित्र दक्षता भएन भने त्यसले उत्पादकत्व ल्याउन नसक्ने उहाँले प्रष्ट पार्नुभयो । यसैगरी, नेफ्स्कून अध्यक्ष ढकालले संस्था स्थापनाको ध्येय भुल्यौं भने अस्तित्व गुमाउँदछौं भन्दै ध्येयलाई ध्यान दिन आग्रह गर्नुभयो ।

कार्यक्रमको प्राविधिक सहजीकरण नेफ्स्कूनका अधिकृत सुमनराज घिमिरेले गर्नुभएको थियो ।