काठमाडौं । नेपाल सहकारी पत्रकार समाज (सीजेएन) आजबाट १४ वर्ष प्रवेश गरेको छ । सहकारी क्षेत्रलाई मुख्य बीट बनाएका कलमजीवीहरु (पत्रकार) को एक मात्र छाता संगठनका रुपमा २०६८ साल भदौं १९ गते स्थापित भएको थियो ।

यसैबीच, १४औं स्थापना दिवसको अवसरमा सीजेएनका अध्यक्ष काजी श्रेष्ठले प्रतिबद्धता जारी गर्दै आफ्ना सदस्य पत्रकारहरुको सीप तथा क्षमता  समयानुकूल तिखार्दै गुणात्मक विकासमा जोड दिएको बताउनुभएको छ । उहाँले यो लामो अवधिसम्म आइपुग्दा सीजेएन परिपक्व हुँदै गएको दाबी गर्नुभएको छ । यसबीच संगठनले प्रतिवद्धतामा भनिएको छ, ‘जसरी पत्रकारितालाई समाजको वाचडगको रुपमा परिभाषित गरिएको छ, सीजेएनले पनि आफ्ना सदस्यको हितसँगै उनीहरुले पस्कने समाचार सामाग्रीलाई थप परिस्कृत बनाउने वातावरण सृजना गरिरहेको छ ।’

सरकार, सहकारी अभियान र पत्रकारितालाई जोड्ने मध्यस्थकर्ताको रुपमा रहेको सीजेएनले आगामी दिनमा पनि पेशागत र व्यावसायिक धर्म निर्वाह गर्ने भन्दै पारस्परिक साथ र सहयोगको अपेक्षा पनि गरेको छ ।

यसैबीच, सीजेएनले आज भूमि व्यवस्था, सहकारी तथा गरिबी निवारण मन्त्री बलराम अधिकारीको प्रमुख आतिथ्यतामा स्मारिक विमोचनसँगै सम्मान तथा पुरस्कार प्रदानको औपचारिक कार्यक्रम गरी स्थापना दिवस मनाउँदैछ ।