भक्तपुर । बालकुमारी बचत तथा ऋण सहकारी संस्था लि.ले साताव्यापी कार्यक्रम आयोजना गरी २५ औं स्थापना दिवस तथा रजत महोत्सव मनाइरहेको छ । साकोसले भक्तपुर जिल्लाव्यापी चित्रकला प्रतियोगिता, रक्तदान कार्यक्रम, वित्तीय साक्षरता कार्यक्रम सम्पन्न गरेको छ । संस्थाले  साताव्यापी कार्यक्रमको पहिलो दिन भदौं २७ गते संस्थामा आवद्ध सदस्यहरुलाई लक्षित गरी वित्तीय साक्षरता कार्यक्रम सम्पन्न गरेको हो । संस्थाका अध्यक्ष तुईलाल श्रेष्ठको अध्यक्षतामा भएको कार्यक्रममा नेफ्स्कूनका सहायक कार्यकारी अधिकृत दुर्गाप्रसाद ढकालले प्रशिक्षण दिनुभएको थियो ।

संस्थाका अध्यक्ष श्रेष्ठले शाताव्यापी कार्यक्रम आयोजना गरी स्थापना दिवस मनाइराखेको जानकारी गराउनुभयो । संस्थाले साताव्यापी कार्यक्रमको पहिलो दिन वित्तीय साक्षरता मार्पmत सहकारी के हो र संस्थाप्रति सदस्यको भूमिका के हुन्छ भन्ने विषयमा प्रशिक्षण दिएको जानकारी गराउनुभयो । त्यसैगरी, ऋण परिचालन र बचत गर्दाको महत्वको विषयमा पनि जानकारी दिइएको थियो । तालिममा २ सय बढी सदस्यको सहभागिता थियो । संस्थाले भक्तपुर जिल्लाव्यापी चित्रकला प्रतियोगिता समेत आयोजना गरेको छ ।

संस्थाले बालकुमारी मन्दिर क्षेत्र र बालबालिकालाई पायक पर्ने अन्य दुई ठाउँमा समेत गरी तीन क्षेत्रमा चित्रकला प्रतियोगिता आयोजना गरेको छ । संस्थाले शाताव्यापी कार्यक्रमको तेस्रो दिन खुल्ला रक्तदान, चौथो दिन बृद्धाआश्रम तथा मानवविद्या गृहलाई भौतिक सामाग्री सहयोग,पाँचौ दिन सरसफाई कार्यक्रम,छैटौँ दिन प्रभातफेरी कार्यक्रम र सातौं दिन रजत महोत्सव समारोह समापन तथा सस्थापक पूर्व सञ्चलाक र कर्मचारीलाई सम्मान गरी रजत बर्ष कार्यक्रम समापन गर्ने संस्थाले जनाएको छ ।