काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का कोषाध्यक्ष दिपक थापाले चमेली साकोसले आर्थिक पारदर्शिता कायम गर्दै संस्थालाई थप सबल बनाउँदै लगेकोमा प्रशंसा गर्नुभएको छ । उहाँले धेरै जसो वित्तीय संस्थाको वित्तीय विवरण अपेक्षाकृत राम्रो नरहेको अवस्थामा पनि चमेली साकोसले आर्थिक पारदर्शितालाई केन्द्रमा राखी संस्थागत सक्षमता र व्यवासायिक सफलता प्राप्त गर्नु खुसीको कुरा भएको बताउनुभयो । 

भक्तपुरको सुर्यविनायक नगरपालिका-१ विरुवास्थित चमेली साकोसको असोज ५ गते सम्पन्न २२औं वार्षिक साधारण सभाका प्रमुख अतिथि नेफ्स्कून कोषाध्यक्ष थापाले वित्तीय सहकारीहरुले अत्यधिक तरलता न्यूनीकरण गर्न कृषि एवं पर्यटन क्षेत्रमा लगानी गर्नुपर्नेमा जोड दिनुभयो । उहाँले स्थानीय उत्पादन एवम् स्थानीय संस्कृतिलाई समेत सहकारीमार्फत प्रवर्धन एवम् विकास गर्न सकिने भएकाले त्यसतर्फ सदस्यहरुको अभिमुखीकरणको आवश्यकता औंल्याउनुभयो ।

कार्यक्रमका सभाध्यक्ष एवं चमेली साकोसका अध्यक्ष प्रमोद घिमिरेले वर्तमान अवस्थामा सुशासनमा नचलेका केही सहकारीहरुको कारण सिंङ्गो सहकारी अभियान प्रति आम जनमानसमा भ्रम सृजना हुनगएको बताउनुभयो । उहाँले सहकारीकर्मीहरु र सहकारी संस्थाहरुले ठोस रणनीति लिई सहकारी मैत्रीकारोबार र सदस्य केन्द्रीत गतिविधि गर्दै त्यसप्रति सजग रहनुपर्ने आवश्यकता रहेको बताउनभयो ।

कार्यक्रममा चमेली साकोसका उपाध्यक्ष मिठाराम न्यौपानेले प्रमुख अतिथि, विशेष अतिथि, अतिथि लगायत सम्पूर्ण उपस्थित सदस्यहरुलाई स्वागत गर्दै आफ्नो मन्तव्य राख्नुभएको थियो । साकोसका सचिव दिपककुमार न्यौपानेले सचिवको प्रतिवेदन पेश गर्नुका साथै कार्यक्रम संचालकको भूमिका निर्वाह गर्नुभएको थियो । संस्थाका कोषाध्यक्ष नवराज घिमिरेले कोषाध्यक्षको प्रतिवेदन पेश गर्नुका साथै संस्थाको वर्तमान आर्थिक अवस्थालाई प्रष्ट पार्नुभएको थियो । साथै संस्थाको लेखा सुपरिवेक्षण समिति संयोजक शालिकराम घिमिरेले लेखा सुपरिवेक्षण समितिको प्रतिवेदन पेश गर्नुभएको थियो ।

कार्यक्रममा ज्येष्ठ नागरिक सदस्यहरुलाई सम्मानतथा पुरस्कार वितरण गरिएको थियो । साथै संस्थामा आबद्ध सदस्यको छोराछोरीमध्ये एसइईमा उत्कृष्ट जिपिए ल्याउने छात्राछात्रालाई पनि सम्मान तथा पुरस्कार वितरण गरिएको थियो । संस्थामा लामो समय कार्य गर्नुभएका प्रल्हाद घिमिरेलाई उत्कृष्ट कर्मचारीको रुपमासम्मान गरिएको थियो । संस्थाले उत्कृष्ट ऋणि, उत्कृष्ट वचतकर्ता र उत्कृष्ट लघुवित्त समूहलाई समेत सम्मान गरेको थियो । वार्षिक साधारणसभाको अवसरमा आयोजना गरिएको रक्तदान कार्यक्रममा सन्ताउन्न जना रक्तदाताले रक्तदान गर्नुभएको थियो ।

यसैबीच, साधारण सभाले गत आर्थिक वर्षको मुनाफाबाट सदस्यलाई १५ प्रतिशत लाभांश दिने प्रस्ताव पारित गरेको छ । संस्थाले गत आर्थिक बर्षमा ३ करोड ३३ लाख ४७ हजार सञ्चालन मुनाफा आर्जन गरेको थियो । संस्थाले ३४ लाख ४४ हजार आयकर व्यवस्था गरी २ करोड ९९ लाख २ हजारलाई विनियम अनुसार विभिन्न कोषहरुमा बाँडफाड पश्चात शेयर लाभांश कोषमा १ करोड ८ लाख ६० हजार विनियोजन गरेको सभामा जानकारी दिइयो ।

उक्त कोषबाट सदस्यलाई १५ प्रतिशत लाभांश प्रदान गरिने भएको हो । त्यसैगरी संस्थाले संरक्षित पुँजी फिर्ता कोषमा पनि ४२ लाख ५ हजार छुट्याएको छ भने उक्त कोषबाट सदस्यहरुले ऋण र  बचतमा गरेको योगदानका आधारमा ६० र ४० प्रतिशत फिर्ता दिने भएको छ ।