काठमाडौं । नेफ्स्कून तथा जर्मनीको सेभिङज् बैंक अन्तर्गतको विकास नीति हेर्ने अंग (डीएसआईके) को आयोजनामा ९ दिने 'बचत खेल र लघु उद्यम खेल प्रशिक्षक प्रशिक्षण तालिम' (टट्) काठमाडौंमा सम्पन्न भएको छ ।

२०८१ भदौं ३१ गतेबाट सुरु भएको तालिम असोज ८ गते सम्पन्न भएको हो । तालिममा नेफ्स्कूनका १३ पुरुष र २ महिला कर्मचारीको सहभागिता थियो ।

नेफ्स्कून र जर्मनीको स्पार्कासन्स फाइनान्स ग्रुप अन्तर्गतको डिएसआईकेबीचको रणनीतिक साझेदारी अन्तर्गत यो लामो अवधिको तालिम आयोजना गरिएको हो ।

स्पार्कासन्स फाइनान्स ग्रुपले डिएसआईके मार्फत वित्तीय पहुँच अभिवृद्धि गरी गरिबी निवारणमा भूमिका निर्वाह गर्ने विषयमा सफल साबित आफ्नो मोडललाई मुलुकको सीमा र त्यो भन्दा पर विकासोन्मुख तथा उदीयमान अर्थतन्त्रहरुमा लागू गर्दै आएको छ ।

सोही सन्दर्भमा नेपालमा पनि सहकारीका सदस्यहरुमार्फत पिँधमा परेको वर्ग र समुदायको वित्तीय पहुँच अभिवृद्धि गर्ने हेतुले नेफ्स्कूनसँगको साझेदारीमार्फत विभिन्न चरणमा तालिम र शिक्षा लगायतका कार्यक्रम आयोजना गरिएका हुन् ।

यसैबीच, तालिम समापनमा नेफ्स्कूनका अध्यक्ष चन्द्र प्रसाद ढकालले ९ दिने तालिमको प्रभावकारिताप्रति आफू विश्वस्त भएको बताउँदै प्रशिक्षितहरु अब दुई तालिमको दूतका भएको उल्लेख गर्नुभयो । नेपालको कुना कन्दरालाई जर्मनीको सिकाइसँग जोड्ने प्रतिनिधि भएको बताउँदै उहाँले तालिमबाट प्रशिक्षितहरुलाई नेतृत्वको संज्ञा दिनुभयो ।

तालिमको समापनमा अध्यक्ष ढकालले भन्नुभयो, ‘तपाईको काम, क्रियाकलाप, योगदानले तपाईको पहिचान झल्कन्छ । तपाईहरु तपाई हुने तपाईको काम र योगदानले हो । त्यसैले जिम्मेवार भएर उच्च मनोबलका साथ काम गर्नुस् ।’ उहाँले थप्नुभयो, ‘आफुलाई निर्खार्ने तथा तिखार्ने कार्यमा निरन्तर क्रियाशिल रहनुस् । पक्कै पनि बुझाइमा एकरुपता कायम गर्न यो तालिम प्रभावकारी भएको मैले महसुस गरेको छु । यो खेल तालिममा जीवन्तता दिने गरी कार्य गर्नुहुनेछ भन्ने अपेक्षा गर्दछु ।’

यसैगरी, नेफ्स्कूनका प्रमुख कार्यकारी अधिकृत (सिईओ) डा. शिवजी सापकोटाले १५ जनाले ९ दिनको तालिम प्राप्त गरेकोमा बधाई दिदैं प्रशिक्षितहरुले वित्तीय पहुँच नपुगेको वर्गमा दुतको रुपमा गई कार्य गर्नुपर्ने बताउनुभयो ।

उहाँले नेफ्स्कूनको ध्यये नै जनताहरुको जीवनस्तर उकास्ने रहेको भन्दै १५ जनाको तालिममा ८ दिनमा बचत तथा ऋण सहकारी अभियानको जननी जर्मनीलाई नजिकबाट नियाल्ने मौका पाएको उहाँले उल्लेख गर्नुभयो ।

त्यहाँको सहकारीको चेत तथा सिकाइलाई अनुसरण गर्नेक मौका यो तालिमले सहभागीहरुलाई उपलब्ध गराएको सिईओ सापकोटाले बताउनुभयो ।

उहाँले भन्नुभयो, ‘तालिम सम्पन्न गरेबापत तपाईहरुले प्रमाणपत्र त प्राप्त गर्नुभयो । अब प्रमाणिकृत हुनका लागि परिक्षणको सुरुवात हुनेछ । तपाईहरुले आफूले सिकेको ज्ञान सीप भुइमान्छेहरु माझ लैजानु पर्छ । तपाईको कौशलले मानिसहरुको ज्ञान, सीप व्यवहार र आचरणमा परिवर्तन गराउनुपर्छ  तपाईहरुले बचत खेल र लघु उद्यम खेलको मार्गनिर्देशनको प्रवर्तकको भूमिका निर्वाह गर्नुपर्नेछ ।

तपाईले जर्मनीको सिकाईलाई समुदायका पहुँचविहिन माझ लैजानु पर्दछ ।’ आफ्नो कामलाई माया गर्न आग्रह गर्दै सिईओ सापकोटाले उच्च मनोबलका साथमा कर्ममा लाग्न सुझाउनुभयो ।

उहाँले भन्नभुयो, ‘यो सिकाइ मोड्युलका विषयवस्तु, सन्दर्भ सामग्रीहरु नेपाली भाषामा तयार गरी तपाईलाई उपलब्ध गराइनेछ । अब तपाईहरु हाम्रो समुदायका भुईमान्छेहरु माझ जान तयारी गर्नुहोस् ।’

तालिमको प्रशिक्षण डिएसआईकेका अल्बर्टो र टुङले गर्नुभएको थियो भने भाषा तथा विषयवस्तु सहजकर्ता सुर्यलक्ष्मी बज्राचार्य रहनुभएको थियो । यसैगरी, डीएसआईकेबाट यान बायर र लाउरा स्कियालोको पनि सहभागिता थियो । समापनमा नेफ्स्कूनका अधिकृतद्वयः सुमनराज घिमिरे र सोविता मौनालीले तालिमको सिकाइ तथा सुझावबारे अनुभवजन्य धारणा राख्नुभएको थियो भने कार्यक्रम सञ्चालन नेफ्स्कूनका अधिकृत श्यामराजा तिमल्सीनाले गर्नुभएको थियो ।