काभ्रे । बुडोल सामुदायिक बचत तथा ऋण सहकारी संस्था लि. को अध्यक्षमा पुनः कैलाश केसी निर्वाचित हुनुभएको छ । असोज १९ गते शनिबार सम्पन्न संस्थाको २५ औं वार्षिक साधारण सभाले चार वर्षको लागि कैलाश केसीको नेतृत्वमा सञ्चालक समिति र पूर्णबहादुर कार्कीको संयोजकत्वमा लेखा सुपरीवेक्षण समिति सर्वसम्मत निर्वाचित  गरेको हो ।

नवनिर्वाचित सञ्चालक समितिको उपाध्यक्षमा प्रकाश भुर्तेल, सचिवमा जयराम थापा, कोषाध्यक्षमा राधेश्याम केसी, सह–सचिवमा गीता कुँवर क्षेत्री, सह-कोषाध्यक्षमा राधाकृष्ण श्रेष्ठ चयन हुनुभएको छ । त्यस्तै सञ्चालक समितिको सदस्यहरुमा हरिराम कुइकेल, गायत्री खड्का, भवानी केसी, सुनिता मल्ल ठकुरी, अर्मेसा लामा चयन हुनुभएको हो ।

त्यस्तै लेखा सुपरीवेक्षण समितिको सदस्यहरुमा शर्मिला नेपाल र दिपक केसी निर्वाचित हुनुभएको छ । संस्थाले २५औं वार्षिक साधारण सभा चाव वटा एकाईमा सञ्चालन गरेको थियो ।

संस्थाको साधारण सभा पाँचखाल, नाला, धुलिखेल र बनेपा एकाइमा क्रमशः असोज १४ गतेदेखि १७ गतेसम्म एकाइगतरुपमा सम्पन्न गरी शनिबार निर्णय प्रमाणित सभा सम्पन्न भएको हो । चार वटै एकाईबाट छनोट भएर आएका प्रतिनिधि र निर्णय प्रमाणितकर्ताहरूको साथमा शनिबार अन्तिम निर्णय प्रमाणित सभा भएको थियो ।

साधारण सभाले विभिन्न प्रतिवेदनहरु सर्वसम्वत रुपमा पारित गरेको छ । साथै सभाले सदस्यहरुलाई १० प्रतिशतका दरले शेयर लाभांश वितरण गर्ने निर्णय गरेका छ ।

संस्थाको आर्थिक वर्ष २०८०/०८१ को अन्त्यमा संस्थाको कुल सम्पत्ति २ अर्ब ७६ लाख, कुल बचत १ अर्ब ५८ करोड ५ लाख , शेयर पुँजी १६ करोड ५७ लाख, लगानीमा रहेको ऋण १ अर्ब ३५ करोड ६१ लाख, संस्थागत पूँजी १६ करोड ६२ लाख र सञ्चालन मूनाफा ५ करोड ६२ लाख रहेको छ ।

यसका साथै सभाले संरक्षित पुँजी फिर्ता कोषबाट बचतमा योगदान गर्ने सदस्यहरुलाई २.५ प्रतिशत र ऋणमा योगदान गर्ने सदस्यहरुलाई २.५ प्रतिशतका दरले हुन आउने रकम प्रदान गर्ने निर्णय गरेको छ ।