म्याग्दीस्थित पश्चिम नेपाल बचत तथा ऋण सहकारी संस्था लि. को १७ औं बार्षिक साधारण सभा असोज १९ गते सम्पन्न भएको छ । संस्थाको गत बैशाख ११ गतेको सञ्चालक समितिको निर्णयानुसार असोज ५ गतेबाट सुरु भएको सेवा केन्द्रस्तरीय साधारण सभा असोज १९ गते निर्णय प्रमाणीकरण सभा गरी सम्पन्न भएको हो । 

साकोसका अध्यक्ष भिमप्रसाद गौतमको अध्यक्षतामा आयोजित साधारण सभाकी प्रमुख अतिथि नेफ्स्कून सञ्चालक कमला देवि गिरी रहनुभएको थियो । सभामा उहाँले समयमै साधारण सभा सम्पन्न गरेकोमा पश्चिम नेपाल साकोसलाई बधाई शुभकामना दिदैं साकोसको उत्तरोत्तर प्रगतिको कामना गर्नुभयो ।

उहाँले साकोसले नीति, विधि र प्रविधिमा आधारित भई सदस्यहरुको सेवामा कटिवद्ध हुनुपर्ने भन्दै सुशासनलाई केन्द्रमा राखेर साकोस सञ्चालनका लागि आग्रह गर्नुभयो । समुदायमा आधारित सहकारीहरुको आवश्यकता आजको दिनमा झनै टड्कारो भएको भन्दै सदस्यहरुलाई हर प्रकारको सेवा प्रदान गर्ने सहकारीहरु सदस्यको मनमा बस्ने पनि उहाँले बताउनुभयो । 

सभामा स्थानीय लब्धप्रतिष्ठितहरु, साकोसको सञ्चालक समिति, लेखा सुपरिवेक्षण समिति तथा उपसमिति, व्यवस्थापन तथा सेयर सदस्यहरुको बाक्लो उपस्थिति थियो ।

२०६३ सालमा स्थापित पश्चिम नेपाल साकोस समुदायमा आधारित भई सदस्यहरुलाई सेवारत छ । यसैगरी, साकोसका अध्यक्ष गौतम नेफ्स्कूनको पोखरा सदस्य सेवा कार्यालय व्यवस्थापन उपसमिति सदस्य समेत हुनुहुन्छ ।