दोलखा । चाड पर्वमा हाम्रो जनकल्याण भन्ने अभियानलाई सार्थक बनाउँदै भीमेश्वर नगरपालिकाका ९ वटाका असहाय व्यक्ति तथा परिवारलाई खाद्यन्न सहयोग वितरण गरिएको छ ।

९ वटै वडाले सिफारिस गरेका ३/३ जना गरी २७ जना व्यक्तिलाई सम्बन्धित वडाको पायक पर्ने स्थानमा पुगी उक्त खाद्यन्न सहयोग वितरण गरिएको हो ।

चाड पर्वहरु मध्ये नेपाली समाजमा बढी महत्व पाएको र पारिवारिक जमघटका साथ मनाइने चाड दशैंमा आयआर्जन गर्न सक्ने परिवारमा जुन खुशीका साथ दशैं भित्रन्छ आयआर्जन गर्न नसक्ने र असहाय परिवारमा दशैंले पीडा थप्ने रे खुशी लुटिने भएकाले थोरै भएपनि खुशी बाँड्नु पर्छ र असहाय व्यक्ति  वा परिवारमा पनि खुशीका साथ दशैं मनाउने वातावरण बनाउनुपर्छ भन्ने सन्देशका साथ विगत ३ वर्षदेखि हाम्रो जनकल्याणले खाद्यन्न सहयोग वितरण गर्दै आएको छ ।

खाद्यन्न सामग्रीमा चामल, तेल, चिउरा, मसला, चिनी लगायतका सामग्री राखिएको थियो । प्रति व्यक्तिलाई तीन हजार तीन सय बराबरको सामग्री वितरण गरिएको संस्थाका प्रमुख कार्यकारी अधिकृत दिपक बस्नेतले जानकारी दिनुभयो ।

संस्थाले सामाजिक उत्तरदायित्व अन्तरगत फरक फरक गतिविधि सञ्चालन गर्दै आइरहेको छ । त्यसै अन्तरगत खाद्यन्न सहयोगलाई निरन्तरता दिएको संस्थाका अध्यक्ष राजन श्रेष्ठले जानकारी दिनुभयो ।

हाम्रो जनकल्याण आफ्नो मुख्य व्यवसायसँगै सामाजिक गतिविधि र स्थानीय सरकारको साझेदारका रुपमा रहेको भीमेश्वर नगरपालिका वडा नम्बर ३ का अध्यक्ष हरिशरण शिवाकोटी बताउनुहुन्छ ।

हाम्रो जनकल्याणले गर्ने गतिविधिहरु पारदर्शी र समाजको आवश्यकतालाई पूरा गर्ने किसिमको भएको बताउँदै भीमेश्वर नगरपालिका वडा नम्बर ६ का वडा अध्यक्ष नबीन कुमार लामाले बताउनुभयो ।

खाद्यन्न सामग्री ग्रहण गर्दै भीमेश्वर १ सुस्पाक्षमावतीको ८५ वर्षीय मंगली थामीले हाम्रो जनकल्याण मेरो लागि ईश्वर भएर आएको बताउनुभयो । सहयोग प्राप्त गर्ने त्यसै वडाकी एक सय वर्षकी आइतीमाया थामी जसले श्रीमान गुमाएको ५० वर्ष भइसक्यो । देवरको हेरचाहमा रहेकी आइतीमायाको देवरको मृत्यु भएको पनि १५ वर्ष बढी भइसकेको छ । नजिकै रहेकी छोरीले हेरचाह गरेपनि छोरीको पनि आर्थिक अवस्था भने दयनीय नै भएको स्थानीयहरु बताउँछन् ।

त्यसैगरी, उमेरमै उच्च रक्तचाप भई शारीरिक अपाङ्गता भएका ३७ वर्षीय पूर्ण सार्की गहभरी आँशु बनाउँदै ७४ वर्षका वृद्ध बुबालाई पालनपोषण गर्नुपर्नेमा आफू विरामी परेकाले वृद्ध बाबुको कमाइले आफू बाँच्नु परेको छ । यस्तो अवस्थामा वडाले गरेको सिफारिसमा हाम्रो जनकल्याणले दिएको खाद्यन्न सहयोगले दशैं खुशीका साथ बित्ने बताउनुहुन्छ । खाद्यन्न सामग्री प्राप्त गर्ने अधिकांश व्यक्तिहरु एकल, अपाङ्गता भएका, दिर्घरोगी तथा श्रीमानबाट पीडित भएका छन् ।