काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) र जिल्ला बचत तथा ऋण सहकारी संघ मकवानपुरबीच सञ्जाल साझेदारी सम्झौता सम्पन्न भएको छ । २०८१ असोज २३ गते नेफ्स्कून केन्द्रीय कार्यालयमा द्धिपक्षीय  साझेदारी सम्झौता सम्पन्न भएको हो ।

नेफ्स्कूनका अध्यक्ष चन्द्रप्रसाद ढकाल र जिल्ला बचत संघ मकवानपुरकी अध्यक्ष कल्पना श्रेष्ठले यो सञ्जाल साझेदारी सम्झौताले  साकोस अभियानको सबलीकरण, सुदृढीकरण तथा गुणस्तरीयता विकासमा महत्वपूर्ण टेवा पुर्याउने विश्वास व्यक्त गर्नुभएको छ । नेफ्स्कून अध्यक्ष ढकालले आफैमा इतिहास बोकेको, वित्तीय रुपमा सबल, सशक्त, सुशासित र सदस्य मैत्री जिल्ला बचत संघ मकवापुरसँगको सञ्जाल सहकार्यले मुलुकको साकोस अभियान एकताबद्ध छ भन्ने सन्देशलाई अझ बढी सार्थक बनाएको दाबी गर्नुभयो ।

उहाँले नेफ्स्कूनको वर्तमान सञ्चालक समिति निर्वाचित भएसँगै सञ्जाल साझेदारीको मोडालिटीमा सदस्यहरुको इच्छा र समयको माग दुबै समेटिने गरी संशोधनमार्फत रणनीतिक मार्गचित्र भित्र प्राथमिकीकरण गरेसँगै द्रुत गतिमा सहकार्य अघि बढेको बताउनुभयो ।

यसैगरी, जिल्ला बचत संघकी अध्यक्ष कल्पना श्रेष्ठले पनि नेफ्स्कूनसँग साझेदारीको निरन्तरताका लागि सम्झौता भएको बताउँदै सदस्य संस्थाहरुको गुणस्तरीयता विकासमा मद्दत पुग्ने उल्लेख गर्नुभयो । मकवानपुर जिल्लामा पनि एक्सेस, प्रोवेसन र कर्ब्स जस्ता गुणस्तर सुनिश्चिताका कार्यक्रमहरुसँगै तालिम शिक्षाका कार्यक्रमहरु सञ्चालन भैरहको बताउँदै उहाँले सञ्जाल साझेदारीमार्फत समन्वय र सहकार्य गरेर अघि बढ्दा सहकारी संस्थाहरुलाई थप टेवा पुग्ने धारणा राख्नुभयो । सञ्जाल साझेदारी केन्द्रीय संघ र जिल्ला संघ दुबैका लागि ‘विनविन’ साझेदारी भएको दुबै अध्यक्षहरुको धारणा थियो ।

पछिल्लोपटक २०८१ असोज ८ गते मंगलबार नेफ्स्कून केन्द्रीय कार्यालयमा  बागमती प्रदेश अन्तर्गतका ६ जिल्ला संघहरुसँग पनि सञ्जाल साझेदारी सम्झौता सम्पन्न भएको थियो । 

बचत तथा ऋण सहकारी अभियानको एउटै ताल र लय हुनुपर्छ भन्ने अन्तर्राष्ट्रिय मान्यतालाई आत्मसात् गरेको नेफ्स्कूनले सञ्जाल व्यवस्थापनलाई छैठौं रणनीतिक मार्गचित्रको प्राथमिकतामा राखेर सोही अनुरुप द्रुत गतिमा काम अघि बढाएको छ ।