भक्तपुर । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्रप्रसाद ढकालले सहकारी ऐन २०७४ को पूर्ण कार्यान्वयन हुन नसक्दा गैर सहकारी नेतृत्वको चलखेल बढेको बताउनुभएको छ । ऐन कार्यान्वयनमा माध्यमबाट हाल देखिएका थुप्रै समस्या समाधान गर्न सकिने भएपनि त्यसतर्फको उदासीनताप्रति उहाँले आश्चार्य भाव व्यक्त गर्नुभयो ।   

भक्तपुरस्थित सामूहिक साकोसले आयोजना गरेको तीन दिवसीय २७औँ स्थापना दिवस समारोहको अन्तिम दिन आज असोज २३ गते प्रमुख अतिथि नेफ्स्कून अध्यक्ष ढकालले सहकारी ऐनको पूर्ण कार्यान्वयनको आवश्यकतामा जोड दिनुभएको हो ।  

साकोसक अध्यक्ष राजाभाई भेलेको सभाध्यक्षतामा आयोजित कार्यक्रममा भक्तपुर जिल्ला बचत तथा ऋण सहकारी संघ लि. का अध्यक्ष कृष्ण गोविन्द लाखाजु र जिल्ला सहकारी संघ लि. भक्तपुरका सचिव रामप्रसाद कासुला लगायत प्रारम्भिक मित्र संस्थाका अध्यक्ष एवम् प्रतिनिधिहरुको समेत आतिथ्यता रहेको थियो ।

कार्यक्रममा नेफ्स्कून अध्यक्ष ढकालले सहकारी अभियानको तर्फबाट ऐन कार्यान्वयनका लागि निरन्तर र सघन बहसपैरवी भएपनि विभिन्न कारणले अपेक्षाकृत नजिता नआएको भन्दै गहिरो चासो व्यक्त गर्नुभयो । यसैगरी, उहाँले कर्जा असुलीमा सुस्तता, बैंक वित्तीय संस्थाको तरतला व्यवस्थापनमा समस्या, सहकारिता भावना, मूल्य मान्यता र सिद्धान्तमा विचलन जस्ता विषयहरुले सहकारी अभियानमा समस्या पैदा गरेको बताउनुभयो ।

नेफ्स्कून अध्यक्ष ढकालले सहकारी कसका लागि ? सहकारी के का लागि ? सहकारी र समुदायबीच के कस्तो सम्बन्ध अपेक्षित छ ? स्थानीय तह र सहकारीबीच के कस्तो समन्वय खोजिएको हो ? जस्ता गहन प्रश्नहरुको उत्तरमा चिन्तनशील भएर घोत्लिन सबैलाई आग्रह समेत गर्नुभयो । कार्यक्रममा नेफ्स्कूनको पछिल्लो अवस्था र यसमार्फत भैरहेका कामहरुबारे समेत सभालाई अध्यक्ष ढकालले जानकारी गराउनुभएको थियो ।

संस्थाका पूर्व अध्यक्ष राजेश बहादुर श्रेष्ठले संस्था स्थापनाको उद्देश्य र संस्थाले शुरुवातमा गरिएको वित्तीय कारोबार विषयमा प्रकाश पार्नुभएको थियो । कार्यक्रममा संस्थाका उपाध्यक्ष कृष्णहरि सैँजुले स्वागत मन्तव्य राख्नुभएको थियो भने कार्यक्रम संचालन संस्थाकी ऋण अधिकृत विन्द्रा नायभाले गर्नुभएको थियो ।

उक्त अवसरमा नेफ्स्कून अध्यक्ष ढकालले ज्येष्ठ सदस्य ५२ जना एसईई र कक्षा १२ का जम्मा २४ जना भाई बहिनीहरुलाई बधाईसहित सम्मानित गर्नुभएको थियो । 

कार्यक्रमको पहिलो दिन सामूहिक साकोसको सक्रियतामा सिपाडोल सुर्यविनायक नपा वडा नं ८ इतबुँमा सामूहिक जीवन योग प्रयोगशाला उद्घाटन सुनपा वडा नं ८ का वडाध्यक्ष पुष्पराज बस्नेतबाट उद्घाटन गरिएको थियो । 'गरौं योग , रहौँ निरोग' भन्ने नारालाई आत्मसात गरि सदस्य एवम टोलका शुभचिन्तकहरुको स्वास्थ्यलाई ध्यानमा राखी योग संचालन गरिएको थियो । 

यसैगरी, कार्यक्रमको दोश्रो दिन सूर्यविनायक नपा वडा नं ८ स्थित सूर्यविनायक गणेश मन्दिर परिसर सरसफाई गरी आवश्यक सरसफाइका सामानहरु डस्टविन, झाडु, पन्जा आदि सामानहरु प्नि सूर्यविनायक समितिका अध्यक्षलाई हस्तान्तरण गरिएको थियो ।