काठमाडौं । पोखरा महानगरपालिका ८ स्थित सृजना महिला बचत तथा ऋण सहकारी संस्था लि. को २२औं वार्षिक साधारण सभा कार्तिक ३ गते सम्पन्न भएको छ । साकोसकी अध्यक्ष सुष्मा पहारी बरालको अध्यक्षतामा भएको सभाको प्रमुख अतिथि वडा नं ८ का वडाध्यक्ष रुद्रनाथ बराल रहनुभएको थियो । 

सभाको उद्घाटन कार्यक्रममा प्रमुख अतिथि बरालले सहकारीका सदस्यहरुलाई स्वरोजगार र उद्यमी बन्न आग्रह गर्नुभएको थियो । उहाँले त्यस्ता सदस्यहरुलाई स्थानीय सरकारको पनि सहयोग रहने प्रतिवद्धता व्यक्त गर्नुभयो । उहाँले संस्थालाई पनि सदस्य सेवा भावलाई केन्द्रमा राखेर काम गर्न आग्रह गर्नुभयो ।

स्मरणीय छ, सृजना महिला साकोस नेफ्स्कून सञ्चालक सदस्य कमलादेवी गिरीले प्रतिनिधित्व गर्नुभएको प्रारम्भिक संस्था हो । सभामा नेफ्स्कून सञ्चालक निर्वाचित हुनुभएकी गिरीलाई बधाई शुभकामना समेत प्रमुख अतिथिले सम्मानित गर्नुभएको थियो । यसैगरी, असल बचतकर्ता सदस्यहरु, बाल बचतकर्ता,  असल कारोबारी जेष्ठ सदस्यलाई पनि सम्मानित गरिएको थियो ।

कार्यक्रममा सम्मानित हुनुभएकी नेफ्स्कून सञ्चालक गिरीले सहकारी संस्था नीति, विधि र सिद्धान्तमा आधारित रही सञ्चालन हुनुपर्नेमा जोड दिनुभएको थियो । साथै उहाँले नेफ्स्कूनको सदस्य सृजना महिला साकोस संघको स्कुलिङ अनुसार चलेको दाबी गर्दै नेफ्स्कूनले सञ्चालन गरेको स्तरीकरण कार्यक्रममा आवद्ध हुनुका साथै स्थिरीकरण कोषमा समेत योगदान गरेको जानकारी गराउनुभयो । साकोसका हर कार्यक्रमप्रति सदस्यहरु चनाखो रहनुभपर्ने भन्दै उहाँले संस्थाका मालिकहरु अर्थात् सदस्यहरुले आफ्नो भूमिका राम्रोसँग निर्वाह गरे सञ्चालक समितिले झनै राम्रो काम गर्ने दाबी गर्नुभयो ।

उहाँले साकोस सदस्य केन्द्रित र समुदायमा आधारित रहनुपर्ने प्राथमिक आवश्यकतामा विशेष जोड दिनुभयो । कार्यक्रममा जिल्ला सहकारी संघ कास्कीका कोषाध्यक्ष नवराज बरालले पनि साकोसलाई बधाईसँगै थप प्रगतिको शुभकामना व्यक्त गर्नुभएको थियो । यस्तै, संस्थाकी पूर्व अध्यक्ष एवम् पोखरा महानगरपालिकाकी जनप्रतिनिधि पवित्रा केसीले सदस्यको साथ र सहयोगका कारण नै साकोसले प्रगति गरेको बताउनुभयो ।  

यस्तै, साकोसकी संस्थापक अध्यक्ष सृजना बरालले स्थापनाकालीन अवस्थासँग अहिलेको अवस्था तुलना गर्दा र प्रगति देख्दा निक्कै खुसी लागेको भन्दै प्रसन्नता व्यक्त गर्नुभयो । साथै उहाँले संस्थाको प्रगतिप्रति बधाई दिदैं आगामी दिन झनै सदस्य केन्द्रीत हुँदै जाओस् भन्ने कामना पनि गर्नुभएको थियो ।

यस्तै, सभामा कास्की बचत संघका सचिव मिनराज तिमल्सिना तथा महानगर सहकारी संघका अध्यक्ष लिलाधर बरालको पनि उपस्थिति थियो । सभामा संस्थाकी उपाध्यक्ष शारदा गिरीले स्वागत मन्तव्य, सचिव तारा केसीले प्रगति प्रतिवेदन र कोषाध्यक्ष सुनिता गिरीले आर्थिक प्रतिवेदन प्रस्तुत गर्नुभएको थियो । पहिलो सत्र सञ्चालन साकोसकी सहसचिव कुमारी मुना बाँस्तोलाले गर्नुभएको थियो ।