काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को आयोजनामा आज (२०८१ कार्तिक ७ गते बुधबार) महोत्तरीको बर्दिबासमा ‘सञ्जाल साझेदारी बैठक’ सञ्चालन गरिएको छ । नेफ्स्कूनका अध्यक्ष चन्द्रप्रसाद ढकालको अध्यक्षतामा आयोजित बैठकमा संघका महासचिव घनश्याम अधिकारी, सञ्चालक शोभा राउत तथा संघका प्रमुख कार्यकारी अधिकृत डा. शिवजी सापकोटाको सहभागिता छ । कार्यक्रममा मधेश प्रदेशका ८ वटै जिल्लासँगै बागमती प्रदेशको सिन्धुलीको पनि सहभागिता रहेको संघको स्थानीय व्यवस्थापनले साकोस आवाजलाई जानकारी गराएको छ ।

अन्तरक्रियात्मक बैठकमा संघका अध्यक्ष ढकाल तथा महासचिव अधिकारीको सहजीकरणमा सञ्जाल साझेदारीका विषयमा अन्तरक्रियात्मक छलफल भएको छ । अध्यक्ष ढकालले सञ्जाल साझेदारीको आवश्यकतासँगै संघको वर्तमान सञ्चालक समितिले यसलाई दिएको प्राथमिकताबारे चर्चा गर्नुभएको थियो । यसैगरी, नेफ्स्कूनका महासचिव घनश्याम अधिकारीले कार्यक्रमको उद्देश्यमाथि प्रकाश पार्नुभएको थियो । साथै उहाँले सञ्जाल साझेदारीले साकोस अभियान सुदृढ अनि सबल हुने धारणा राख्नुभएको थियो ।

बैठकमा अध्यक्ष ढकाल तथा महासचिव अधिकारीले सञ्जाल साझेदारी साकोस अभियानलाई सबल, सुदृढ र गतिशील बनाउने उद्देश्यसहित नेफ्स्कूनले सञ्जाल साझेदारीलाई छैठौं रणनीतिक योजनाको उच्च प्राथमिकतामा राखेको जानकारी गराउँदै यस अभियानमा मधेश प्रदेशबाट पनि साथ र सहयोग मिल्ने विश्वास व्यक्त गर्नुभएको थियो । नेफ्स्कूनले अभियानको सुझावहरु समेटेर सञ्जाल साझेदारी कार्यक्रमको मोडालिटी संशोधन गरेसँगै पछिल्लो समय यसमा सहभागिता वृद्धि भएको भन्दै मधेश प्रदेश साझेदारी कार्यक्रमको महत्वपूर्ण हिस्सा भएको दाबी आजको कार्यक्रममा अध्यक्ष ढकाल तथा महासचिव अधिकारीले गर्नुभएको थियो ।

कार्यक्रममा सहभागी सबै जिल्लाको बचत तथा ऋण सहकारी अभियानबारे जानकारी लिने काम नेफ्स्कून अध्यक्ष, महासचिव तथा सञ्चालक राउतसँगै प्रमुख कार्यकारी अधिकृतले गर्नुभएको छ भने भने सञ्जाल साझेदारीका विषयमा सहभागीहरुका राय, सल्लाह र सुझाव समेत संकलन गरिएको छ । सहभागी जिल्ला संघहरुका प्रतिनिधिहरुले राख्नुभएको जिज्ञासाको पनि सम्बोधन नेफ्स्कून अध्यक्ष र महासचिवले गर्नुभएको थियो । 

कार्यक्रममा नेफ्स्कूनका प्रमुख कार्यकारी अधिकृत डा. शिवजी सापकोटाले सञ्जाल साझेदारीबारे प्रस्तुतीकरण गर्नुभएको थियो । उहाँले सञ्जाल साझेदारीको महत्व, संघको रणनीतिक मार्गचित्रमा अटाएको सञ्जाल साझेदारीको उपादेयतासँगै यससम्बन्धी सफल अन्तर्राष्ट्रिय अभ्यास समेटेर प्रस्तुतीकरण गर्नुभएको थियो । कार्यक्रममा नेफ्स्कून व्यवस्थापनको पनि सहभागिता छ ।

नेफ्स्कूनले सहकारीका 'सहकारीका साझा सवालसम्बन्धी सचेतना कार्यक्रम' सँगै 'सञ्जाल साझेदारी बैठक' सातै प्रदेशमा गर्दैछ । यसको सुरुवात कोशी प्रदेशबाट गरिएको थियो । बर्दिबासमा हिजो 'सहकारीका साझा सवालसम्बन्धी सचेतना कार्यक्रम' सफलतापूर्वक सम्पन्न भएको थियो ।