काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्रप्रसाद ढकालले सहकारीलाई समस्याका रुपमा होइन समाधानका रुपमा हेरिनुपर्ने आवश्यकता औंल्याउनुभएको छ । सहकारीबाटै तल्लो वर्गको सर्वाङ्गीण सुधार हुने भन्दै समाज रुपान्तरणको माध्यम सहकारी भएको दाबी गर्नुभएको छ । त्यसका लागि सहकारीको नेतृत्व सहकारी मैत्री अनि सदस्यहरु चनाखो हुनुपर्ने उहाँको भनाइ थियो ।

काठमाडौं महानगरपालिका ३२ स्थित ब्रजेश्वरी बचत तथा ऋण सहकारी संस्थाले आज २०८१ कार्तिक १० गते शनिबार आयोजना गरेको १६औं वार्षिक साधारण सभाका प्रमुख अतिथि नेफ्स्कून अध्यक्ष ढकालले भन्नुभयो, ‘सहकारीबाटै सम्भावना छ । सहकारी समस्या होइन समाधान हो । सहकारी आशा हो अनि सहकारी उत्साह पनि हो ।’ 

त्यसका लागि सहकारीको नेतृत्व वास्तवमै सहकारी मैत्री (कोअपरेटिभ फ्रेण्ड्ली) हुनुपर्ने भन्दै अहिले समस्या देखिएका सहकारीहरुको नेतृत्वमा त्यो चारित्रिक गुण नदेखिएको बताउनुभएको छ । आज जति पनि ‘सहकारी’ मा समस्या देखिएका छन् तिनको नेतृत्व वास्तवमा कोअपरेटिभ फ्रेण्ड्ली नभएको बताउँदै उहाँले सहकारीको नेतृत्व सहकारी मैत्री हुनैपर्नेमा जोड दिनुभयो ।

अध्यक्ष ढकालले नियमित बचत, समयमै ऋण भुक्तानी, व्यक्तिगत लाभ नभइ सामूहिक हित प्रवर्धन जस्ता विषयहरुमा जोड दिदैं सदस्यहरुले पनि आफ्नो दायित्व निर्वाह गर्नुपर्ने र संस्थाका गतिविधिहरुप्रति चनाखो हुनुपर्ने बताउनुभयो । साकोसका अध्यक्ष शत्रुधन प्रसाद ढकालको अध्यक्षतामा आयोजित सभामा नेफ्स्कून चाबहिल सदस्य सेवा कार्यालय प्रमुख राधा पोखरेलको पनि सहभागिता थियो ।