काठमाडौं। सहकारी संस्थाका ऋणी सदस्यहरूलाई आफूले संस्थाबाट लिएको ऋण समयमै भुक्तान गर्न अन्यथा कानूनी कारबाही भोग्न बाध्य हुनुपर्ने भन्दै सहकारी विभागले सूचना जारी गरेको छ । सहकारीहरूको ऋण असुली नहुँदा संस्थाहरू समस्यामा परेको र बचत फिर्ता गर्न समेत अप्ठ्यारो भएको भन्दै विभागले ऋण तिर्न सूचना जारी गरेको हो । 

‘ऋणी सदस्यहरूले तोकिएको समयभित्र ऋणको साँवा तथा ब्याज चुक्ता नगर्दा संस्थाहरूमा तरलताको समस्या भई सदस्यहरूको बचत फिर्ता गर्न नसकेको गुनासो आइरहेको छ,’ विभागले कार्तिक १३ गते जारी गरेको सूचनामा भनेको छ । विभागले जुन सम्झौता वा शर्त बमोजिम ऋण लिएको हो, सोही बमोजिम ऋणको साँवा, ब्याज लगायत रकम सम्बन्धित सहकारी संस्थामा समयमै भुक्तान गर्न विभागले सूचना जारी गरेको हो । साथै सहकारी संस्थालाई समेत सहकारी ऐन, २०७४ को दफा ७९ तथा सहकारी नियमावली, २०७५ को नियम ३० बमोजिम ऋण तथा बाँकी बक्यौता असुली गर्ने सम्बन्धी व्यवस्था लगायत प्रचलित कानूनी प्रावधानको पूर्ण परिपालना गरी आफ्ना सदस्यको ऋण तथा बक्यौता असुली गर्नेतर्फ थप क्रियाशील रहन विभागले निर्देशन दिएको छ ।